Bugun Changjoudagi “Olympic Mingdu International” mehmonxonasida O‘zbekiston U-22 terma jamoasi hamda OFK rasmiylari va mahalliy tashkiliy qo‘mita ishtirokida uchrashuv bo‘lib o‘tdi.
Unda, dastlab mahalliy tashkiliy qo‘mita a’zolari nomidan musobaqa koordinatori so‘zga chiqdi va O‘zbekiston yoshlar terma jamoasini ushbu turnirdagi ishtiroki bilan qutladi va terma jamoaga turnirda omad tiladi. Shuningdek, musobaqa mezbonlari O‘zbekiston yoshlar terma jamoasiga Osiyo chempionati ishtirokchisi sertifikatini topshirishdi va uni yoshlar terma jamoasi sardori Zabihillo O‘rinboyev qabul qilib oldi.
Shundan so‘ng, Osiyo Futbol Konfederasiyasi rasmiylari O‘zbekiston yoshlar terma jamoasi a’zolari bilan uchrashdi va turnirga tegishli ayrim masalalar yuzasidan suhbatlashdi.
Ta’kidlash lozim, turnir nazoratchi hakami yoshlar terma jamoasi vakillari bilan uchrashuv davomida, o‘yin qoidalari bo‘yicha, unga kiritilgan yangiliklar, feyr-pley kabi masalalar bo‘yicha ma’lumot berdi. Turli roliklar orqali esa terma jamoa vakillari o‘yin qoidalariga kiritilgan yangi o‘zgarishlar, vaziyatlar bo‘yicha bilim va ko‘nikmalarga ega bo‘lishdi.
