Бугун Чангжоудаги “Olympic Mingdu International” меҳмонхонасида Ўзбекистон U-22 терма жамоаси ҳамда ОФК расмийлари ва маҳаллий ташкилий қўмита иштирокида учрашув бўлиб ўтди.
Унда, дастлаб маҳаллий ташкилий қўмита аъзолари номидан мусобақа координатори сўзга чиқди ва Ўзбекистон ёшлар терма жамоасини ушбу турнирдаги иштироки билан қутлади ва терма жамоага турнирда омад тилади. Шунингдек, мусобақа мезбонлари Ўзбекистон ёшлар терма жамоасига Осиё чемпионати иштирокчиси сертификатини топширишди ва уни ёшлар терма жамоаси сардори Забиҳилло Ўринбоев қабул қилиб олди.
Шундан сўнг, Осиё Футбол Конфедерацияси расмийлари Ўзбекистон ёшлар терма жамоаси аъзолари билан учрашди ва турнирга тегишли айрим масалалар юзасидан суҳбатлашди.
Таъкидлаш лозим, турнир назоратчи ҳаками ёшлар терма жамоаси вакиллари билан учрашув давомида, ўйин қоидалари бўйича, унга киритилган янгиликлар, фэйр-плей каби масалалар бўйича маълумот берди. Турли роликлар орқали эса терма жамоа вакиллари ўйин қоидаларига киритилган янги ўзгаришлар, вазиятлар бўйича билим ва кўникмаларга эга бўлишди.
