«Барселона» бош мураббийи Ханс-Дитер Флик «Расинг»га қарши 7:2 ҳисобида якунланган учрашувда дарвозабон Войцех Шеснининг голга сабаб бўлган хатоси ҳақида фикр билдирди.

Польшалик посбон жароҳат олган Жоан Гарсия ўрнига танаффусдан сўнг майдонга тушган эди. 65-дақиқада 36 ёшли дарвозабон тўпни йўқотиб қўйди ва Яссир Забири ушбу имкониятдан фойдаланиб, ҳисобни 4:2 кўринишига келтирди. Қолган вақтда каталонияликлар яна учта гол урди.

«Ҳа, Войцех хато қилди, аммо бу ҳаёт — барчамиз хато қиламиз. Кейинги сафар у яхшироқ ўйнайди, бунга ишонинг», — деди Флик матбуот анжуманида.

Шунингдек, мураббий Шесни ҳамон Жоан Гарсиядан кейин жамоанинг иккинчи рақамли дарвозабони бўлиб қолаётганини тасдиқлади.

«Барселона» навбатдаги учрашувини шанба куни сафарда «Севилья»га қарши ўтказади.