U xitoylik emas, balki yaponiyalik. Uni vaqtida «Real» «brak»ka chiqargan, o‘zi esa «Barselona» safiga qo‘shilishdan bosh tortgan. U hozirda «Manchester Siti»da Xosep Gvardiolaga misli ko‘rilmagan miqyosda ko‘maklashmoqda. U - jahon va Yevropa chempioni. Ko‘pchilik bu ta’riflar mohir yarim himoyachi David Silvaga qaratilganini osongina fahmlagan bo‘lsa, ajabmas.
Fojia yoki bayram?
David Silva qiyofasiga qarab, uning o‘ta xotirjam yigit ekanligini tushunish qiyin emas, to‘g‘ri, ispan yigiti oxirgi «Manchester derbisi»da sardorlik bog‘ichining ta’siridami, xuddi Xalkdek taassurot uyg‘otdi.
Silvaning futbolda erishgan katta g‘alabalari ro‘yxati shunchalik uzunki, unga beixtiyor havasingiz keladi. David Silva - jahon chempioni, Yevropa birinchiligining ikki karra g‘olibi, Angliya chempionati oltin medali va mamlakat kubogi sohibi.
Ammo haqiqat shuki, chinakam chempionlarning hayot yo‘llari faqat g‘alabalardan iborat emas. Ular ham xuddi oddiy odamlardek ba’zan shunchalik og‘ir yo‘qotishlarga duch kelishadiki, alamini bir umr unutmaydilar, unutolmaydilar... Xullas, David 9 yoshga to‘lgan vaqt uning suyukli va mehribon xolasi Loli qizchali bo‘ladi.
David Silva oxirgi vaqtlarda raqib darvozasini zabt etgach, har safar golini og‘ir xastalik tufayli 5 yoshida vafot etgan o‘sha jiyani - Santiya xotirasiga bag‘ishlamoqda. Futbolchining butsasida ham chiroyli yozuv ko‘zga tashlanadi - «Santiya». Qo‘lida esa maxsus tatuirovka bor.
Otasining alohida ta’kidlashicha, Sintiyaning o‘limi Davidni shu darajada ezib qo‘ygandiki, u atigi bir necha daqiqada o‘z-o‘zidan ulg‘ayib qolgandek taassurot uyg‘otgan. Chunonchi, oriqqina yigit Santiyaning ayanchli taqdiridan keyin atrofdagi voqealar, hattoki, futbolga ham boshqacha yondasha boshlagandi. Deylik, Davidni «Real» maktabiga olishmagach, uning o‘zi «Barselona»ning afsonaviy akademiyasiga borishdan bosh tortadi.
Davidga Lionel Messidek afsonani tarbiyalagan maktabdagi tartib-intizomning o‘ta qat’iyligi yoqmagandi. Chunki «La Masiya»da tartibbuzarlarga keskin chora ko‘rilar, intizomni buzganlar sira kechirilmasdi.
Aslida Silva ko‘rinishidan quvnoq va yomshoqko‘ngil yigitga o‘xshasa-da, har doim ham kimnidir aql o‘rgatishiga toqat qilavermaydi. Shuning barobarida doimo o‘zgalarga ko‘maklashishni xush ko‘radi. Ayniqsa, jiyani bilan ro‘y bergan noxushlik uni boshqa bolalarga nisbatan mehrini oshirgan... Muhimi, David ijtimoiy hayotdagi xayrli ishlari matbuotda yoritilishini sira istamaydi
. Ya’ni pinhona xayr-saxovatni ma’qul ko‘radi. Aytgancha, oradan ko‘p yillar o‘tib, Davidning xolasi yana farzand ko‘radi va futbolchi Yoanna ismli qizchaning tutingan otasiga aylanadi.
Xitoylik yoki yapon?
David Ximenes (futbolchining haqiqiy ism-familiyasi) yoshligida xitoylikka o‘xshamasada, Kanar orollari quyoshida toblangan ispan yigitlaridan alohida ajralib turardi. Xususan, ko‘zlari qisiqligi bilan.
Shu boismi, maktabdosh o‘rtoqlari unga qiziqarli laqab «yopishtirishadi» - «xitoylik». David ko‘chada birga to‘p ketidan chopadigan sinfdosh do‘stlariga ota tomondan ispan, ona tomondan esa yapon ekanligini ming uqtirsa-da, bolalar «xitoylik» iborasidan voz kechishmaydi.
Natijada bu laqab unga umrbod yopishib qoldi. Ha, Davidning onasi Yaponiyadan, ammo ismi negadir Eva, familiyasi ham yaponlarga xos emas - Silva. Tashqi ko‘rinishidan esa haqiqiy yapon ayoliga o‘xshaydi.
To‘g‘ri, Davidga qarasangiz, uning osiyolik ekanligi tasavvuringizga sig‘maydi aslo. Shunga qaramay, futbolchi tomirlarida yaponlar qoni ham oqayotganidan faxrlanadi. Yana bir dalil - David Yaponiya futboli yulduzi - Xidetoshi Nakata bilan qarindosh va aytishlaricha, bolaligida aynan unga o‘xshagan ekan.
Aytish kerak, qahramonimiz futbol masalasida «Roma»ning afsonaviy xavbegidan allaqachon o‘zib ketishga ulgurdi. Zero, u yevrofutbol ta’limini olgan, ma’lum-u mashhur murabbiylar qo‘l ostida shug‘ullangan. Deylik, polisiyachi sifatida ishlagan otasi vaqtida Xuan Karlos Valeron bilan birga to‘p surgan.
Davidning o‘zi keyinchalik «Valensiya» maktabida tahsil oldi va aynan levantiyaliklar iltimosiga ko‘ra, familiyasini o‘zgartirdi - Ximenesdan Silvaga aylandi. Chunonchi, «Los Ches» akademiyada Ximenes familiyali futbolchilar juda ko‘p edi.
Muhimi, David «Valensiya»ga chinakamiga mehr berdi, jamoada bor kuchi bilan o‘ynadi. Uning sotilishi masalasi kelsak, klub transferga chorasizlikdan ko‘ndi - mablag‘ suv va havoday zarur bo‘lganligi uchun. E’tiborli fakt, David hozirgacha 2 martagina jamoa almashtirdi. Bu unda sadoqat tushunchasi ancha rivojlanganidan dalolat.
David Silva Valensiyada avvaliga doimo g‘ingshib yurdi, xuddi Andres Inyesta «La Masiya»dagi ilk kunlarda o‘zini noqulay sezgandek. Boisi, bolakay yolg‘iz yashashga ko‘nikmagandi. Buvisining aytishicha, David tabiatan barcha g‘am-tashvishlarni ichiga yutadigan yigit. Bunday xarakter bilan esa notanish sharoitga moslashish juda qiyin.
Asosiysi, David maydonda o‘zini mutlaqo erkin tutardi va shu asnoda jamoaga kirishib ketdi. Xullas, vaqtida «Valensiya»ning chap qanot vingeri rolida namoyon bo‘lgan «xitoylik» endi Xosep Gvardiola uchun «Yangi Pirlo»ga aylanib ulgurdi. Faqat yodda tutish kerak - «xitoylik» asli yapondir!
«Real» yoki «Barselona»?
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
