Yana 17 kundan so‘ng Koreya Respublikasining Pyonchxan shahrida XXIII qishki Olimpiya o‘yinlari start oladi.

Unda sayyoramizning 90 davlatidan 6 500 dan ziyod sportchi va rasmiy shaxslar ishtirok etishi kutilmoqda.

2018 yilgi qishki Olimpiya o‘yinlarida O‘zbekiston sharafini ikki nafar sportchi himoya qiladi. Bular figurali uchish bo‘yicha O‘zbekiston terma jamoasi a’zosi Misha Ge va tog‘ chang‘i sporti bo‘yicha mamlakat terma jamoasi yetakchisi Komiljon To‘xtayevlardir. Bu haqda O‘zbekiston Milliy olimpiya qo‘mitasi matbuot xizmati xabar bermoqda.

Musobaqalarga birinchi bo‘lib Misha Ge kirishadi. Misha 16 fevral kuni “Gangneung Ice Arena” muz saroyida figurali uchishning qisqa dasturida chiqish qilsa, ertasiga, 17 fevral kuni erkin dasturda o‘z omadini sinab ko‘radi.

Komiljon To‘xtayev 18 fevral kuni tog chang‘isining gigant slalom bahslarida ishtirok etadi. 22 fevralda esa slalom bo‘yicha musobaqada qatnashadi. Tog‘ chang‘isi bo‘yicha bellashuvlar “Yongpyong Alpine Centre” majmuasida bo‘lib o‘tadi.

Ma’lumot uchun, XXIII qishki Olimpiya o‘yinlari Koreya Respublikasining Pyonchxan shahrida 9-25 fevral kunlari bo‘lib o‘tadi.

Akmalxon Eshonxonov