Bugun, 29 yanvar kuni yoshlar o‘rtasidagi Osiyo chempionati musobaqasida Vyetnam terma jamoasin dog‘da qoldirib, finalda g‘olib chiqqan O‘zbekiston yoshlar terma jamoasi Xitoydan qaytishdi.
“Islom Karimov” nomidagi Toshkent xalqaro aeroportida tantanali ravishda kutib olindi. Tadbirda O‘zbekiston Respublikasi Bosh vaziri Abdulla Aripov, Yoshlar ittifoqi markaziy kengashi raisi Qahramon Quranboyev va MOQ prezidenti Umid Ahmadjonov, davlat va nodavlat tashkilotlari vakillari, el ardog‘idagi san’atkorlar, OAV xodimlari, futbolchilarning yaqinlari, Yoshlar ittifoqi faollari ishtirok etishdi.
Chempionlar joylashgan kortej dastlab Aeroport terminal-3 (mahalliy), Bobur, Nukus, Afrosiyob, Sharof Rashidov, Navoiy ko‘chasi hamda Amir Temur aylanmasi va O‘zbekiston mehmonxonasi bo‘ylab harakatlandi. “O‘zbekiston” mehmonxonasiga tomon yo‘l olgan chempionlarni muxlislar tarixiy kecha uyushtirib iliq kutib olishdi.
Mehmonxona hovlisida chempionlarni rasmiy taqdirlash marosimi bo‘lib o‘tdi. Unda bosh vazir Abdulla Aripov Prezident tabrigini o‘qib eshittirdi. So‘ngra futbolchilarning har biriga prezident sovg‘alari - Chevrolet Malibu rusumidagi avtomobillar taqdim etildi.
Ma’lum bo‘lishicha, 22 ta oq Malibu avtomobili futbolchilarga, 4 ta qora Malibu murabbiylarga O‘zbekiston Respublikasi Prezidenti Shavkat Mirziyoyev tomonidan “Prezident sovg‘asi” sifatida tuxfa etildi.
O‘zbekiston yoshlar terma jamoasi Xitoyga quyidagi tarkibda yo‘l olgan edi.
Darvozabonlar: 12.Dilshod Hamroyev (“Navbahor”), 1.Botirali Ergashev (“Paxtakor”), 21.Rahimjon Davronov (“Mash’al”);
Himoyachilar: 2.Rustam Ashurmatov (“Bunyodkor”), 3.Hojiakbar Alijonov (“Paxtakor”), 4.Akrom Komilov ("Bunyodkor"), 5.Abbosjon Otaxonov (“Navbahor”), 6.Azizjon G‘aniyev (“Nasaf”), 20.Doston Tursunov (“Neftchi”), 13.Islomjon Qobilov (“Bunyodkor”), 18.Husniddin G‘ofurov (“Neftchi”), 15.Oybek Rustamov (“Qo‘qon-1912”);
Yarim himoyachilar: 17.Doston Hamdamov (“Bunyodkor”), 7.Odil Hamrobekov (“Nasaf”), 10.Javohir Siddiqov (“Qo‘qon-192”), 8.Jasurbek Yaxshiboyev (“Paxtakor”), 16.Doniyor Narzullayev (“Nasaf”), 14.Abdujamol Isroilov (“Neftchi”), 23.Suhrob Nurulloyev (“Paxtakor”);
Hujumchilar: 9.Zabihillo O‘rinboyev (“Paxtakor”), 22.Bobir Abdixoliqov (“Nasaf”), 11.Andrey Sidorov (“Qo‘qon-1912”).
