Kolumbiyaning «Fortalesa Sipikara» klubi yangi liboslari ijtimoiy tarmoqlarda katta shov-shuvga sabab bo‘ldi.

Gap shundaki, liboslar an’anaviy tarzdagi homiylik reklamasi va klub emblemasi bilan emas, balki ijtimoiy tarmoqlarga xos bo‘lgan smayliklar va turli emojilar bilan bezatilgan. Jamoa 16 fevral kuni «Lyaneros»ga qarshi o‘yinda shu liboslarda maydonga tushishni rejalashtirmoqda.

Kolumbiya chempionatining 2-divizionida ishtirok etuvchi klub rahbariyati yangi libos haqida ijobiy fikrga ega.

«Dunyoning eng yaxshi libosi! Emojilardan tayyorlangan. Bu yangi ming yillik avlodiga, yangi fanatlarga bag‘ishlangan. Ahmoqlar va to‘polonchilar uchun emas.

Biz turli yoshdagi bolakaylar bilan maslahatlashdik. Klub maktabida 2 ming nafar bola tahsil oladi. Biz ular faxrlanishi mumkin bo‘lgan libosni tayyorladik» - deb yangi libosga ta’rif bermoqda rahbariyat.

Ammo, «Fortalesa» joriy etgan yangilik barchaga birdek yoqmagan. Masalan, ingliz matbuotida klub rahbariyatining bu qarori hazil-mutoyibalarga sabab bo‘ldi.

Daily Mail esa uni 1995/96 mavsumdagi «Manchester Yunayted»ning «ko‘rinmas» libosiga qiyosladi. Bu libos futbolchilarga umumuan yoqmagan, bosh murabbiy Aleks Fergyuson esa «Sauthempton»ga (0:3) qarshi o‘yindagi mag‘lubiyatda aynan uni ayblagan edi - «Bu libosni kiygan futbolchilar maydonda bir-birini ko‘rmay qoldi».

Kolumbiya klubining inqilobiy libosi ahmoqona va beo‘xshov to‘plamlar bilan bir qatordan joy olgan, deb ta’kidlaydi nashr. Hammasidan ham, darvozabonning binafsharang libosi oshirib tushirgan.