Avval xabar berganimizdek, shu yilning 5 mart kuni mamlakatimizda bolalar futboli bo‘yicha faoliyat olib borayotgan futbol Akademiyalari va futbol maktablari mutaxassislari, malakali bolalar murabbiylarining bir guruhi Yaponiyaga jo‘nab ketishgandi.

Mazkur safar O‘zbekiston milliy olimpiya qo‘mitasi prezidenti va O‘zbekiston futbol Assosiasiyasi 1-vise-prezidenti Umid Ahmadjonovning Tokioda Yaponiya Futbol Assosiasiyasi Prezidenti Tashima Kodzo bilan rasmiy uchrashuv davomida imzolagan memorandumi asosida tashki etilganini ham alohida ta’kidlash kerak.

Safardan ko‘zlangan asosiy maqsad yurtimizda bolalar futboli va ommaviy futbolni rivojlantirish bo‘yicha Yaponiya taraqqiyot modelini va tajribasini O‘zbekistonda tatbiq qilish, yurtimizdagi bolalar musobaqalari va futbol tadbirlarida seleksiya ishlarini takomillashtirishda Yaponiya mamlakati tizimidan foydalanishdan iborat.

Mazkur safar bilan bog‘liq masalalar bo‘yicha Yaponiya Futbol Assosiasiyasida maxsus ishchi guruh tuzildi. Assosiasiyaning xalqaro aloqalar bo‘limi mutaxassisi, o‘zbekistonliklar delegasiyasiga mas’ul xodim Tomo Sugiyama o‘zbekistonliklarning Yaponiyadagi tashrifi dasturini ishlab chiqdi.

Unga ko‘ra, delegasiyamiz a’zolariga  Yaponiya U-19 terma jamoasi murabbiyi Masanaga Kageyama seminar o‘tkazdi. Seminar davomida yaponiyalik mutaxassis terma jamoaga futbolchilarni seleksiya qilish, jamoa bilan mashg‘ulotlar o‘tkazishning uslublari va asosiy prinsiplarini tushuntirdi. Bundan tashqari, hamyurtlarimiz Jey-Liga uchrashuvlarini tomosha qilishlari va Yaponiya U-14, U-15 va U-18 terma jamoalari mashg‘ulotlarini kuzatib borishlari ham rejalashtirilgan.