“Bunyodkor” – “Paxtakor” uchrashuvidan keyingi matbuot anjumaning ikkinchi qismida “qaldirg‘ochlar” vakillari qatnashishdi.

- Derbiga xos o‘yin bo‘ldi. Shiddatli va keskin kurashlarga boy uchrashuvdan eng avvalo, muxlislar yutdi, deb o‘ylayman. G‘alaba qozondik. Bundan xursandmiz. Shogirdlarimdan fahrlanaman.

To‘g‘ri, birinchi bo‘limda tashabbus raqib tomonida bo‘ldi. Biroq ikkinchi bo‘lim teng kurashlar ostida o‘tdi. Aniqrog‘i, jamoalar ochiq futbol ko‘rsatishdi. Golli vaziyatlar aynan ikkinchi 45 daqiqalikda ko‘proq yaratildi.

Stadionga tashrif buyurib, ajoyib muhit yaratgan muxlislarga rahmat aytaman. Bunday sharoitda to‘p tepish yoqimli. Agar muxlislar oqimi shunday bo‘lib tursa, futbolchilar ham qo‘shimcha motivasiya bilan harakat qilishadi va albatta bundan futbolimiz yutadi.

Bugungidek uchrashuvlar orqali futbolchilarning mahorati oshib boraveradi. Tarkibimizda o‘zgarishlar bor. Yetakchilarimiz jamoani tark etishdi. Ammo bundan fojea yasamay, yangi futbolchilarni ixtiro qilamiz, - deydi Mirjalol Qo‘shoqovich.

- Derbiga o‘zgacha ruhda tayyorlangan edik. Yigitlar bilan birdam bo‘lib, ushbu o‘yinga alohida tayyorlangandik. Murabbiylarning kzrsatmalari asosida g‘alaba qozondik. O‘yin so‘nggidagi penaltida tavakkal qilishni ma’qul topmadim.

Shunchaki, to‘p yo‘nalishiga qarab ish tutdim. Omadim chopib, darvozam dahlsizligini saqlab qoldim, - deydi shu kuni “Bunyodkor” tarkibida uchrashuvning eng yaxshi futbolchisi deb topilgan Murodjon Zuhurov.