Ruminiyalik afsonaviy futbolchi, “Karpat Maradonasi” deya e’tirof etiladigan Georgiy Xajining 19 yoshli yoshli o‘g‘li - Yanisni uch mamlakat klublari o‘z safiga taklif etmoqda.

Ikki yil avval kichik Xajini “Viitoril”dan  “Fiorentina” klubi 2 million yevrodan ortiroq mablag‘ga sotib olgandi.

Biroq Yanisning Italiyada omadi chopmadi. Yana otasi boshqaruvidagi eski jamoasi tarkibiga qaytdi. Rumiyani gazetalarida yozilishicha, yarim himoyachi yozgi transfer mavsumida kuchli chempionatlardan biriga yo‘l oladi.

Bu haqida uning agenti Piyetro Chiodi shunday deydi:

“Yanisning kelajagi borasida aniq takliflar bor. Ispaniya, Italiya va Belgiya klublari uni o‘z saflarida ko‘rishni istashmoqda. Tezroq bir qarorga kelishimiz kerak”.

Yanis, xuddi dadasi singari yarim himoyaning markazida to‘p surishdan tashqari, hujum ortida ham yaxshi harakatlana oladi.

Ma’lumot uchun, Turkiyada tug‘ilgan, asli ruminiyalik Yanisning “Transfermarkt” saytidagi narxi 1 million yevroga baholanmoqda.