Afsuski, JCH-2018 uchun ne-ne mashaqqatlar bilan maxsus tayyorlangan to‘plar u bilan tanishib chiqqan darvozabonlar ko‘nglini xushnud etolmadi.
Oqibatda, Soccer.ru sayti anchadan buyon qizg‘in bahslarga sabab bo‘layotgan ajib nazariyani qaytadan ko‘rib chiqdi: FIFA amaldorlari darvozabonlarga to‘sqinlik qilishyaptimi?
E’tiboringizni uchinchi mingyillikda bo‘lib o‘tgan mundiallar va ularda qayd etilgan natijalarga qaratamiz.
JCH-2002. Darvozabonlarga qarshi «suiqasd»
Fevernova to‘pini yaratish uchun «Adidas» muhandislari rosa 3 yil ter to‘kishdi. Qandaydir inqilob amalga oshirilgani yo‘q, shunchaki, 32 bo‘lak 6 qirrali xom ashyoni biriktirishdi. Ishlab chiqarish texnologiyasi va materiallar o‘zgartirildi.
To‘p dastlabki kundanoq darvozabonlarning kuchli tanqidlariga uchradi. U o‘ta yengil va g‘ayritabiiy edi. Qalinligi 3 mm. bo‘lgan qoplamalarning evaziga Fevernova barqaror parvozga ega bo‘lib, hujumchilar uchun qulay edi.
Ishtirokchilar soni 32taga yetkazilgan dastlabki musobaqa - Fransiya-98da uchrashuvlardagi o‘rtacha mahsuldorlik 2,67ta golni tashkil etgandi. J. Koreya va Yaponiyada bu ko‘rsatkich 2,52ga tushib qoldi. Taajjubki, to‘pni barcha hujumchilar uchun tayyorlashgan, ammo undan unumli foydalanish faqat Ronaldoga nasib etdi.
Braziliyalik afsonaviy to‘purar 8 marta raqiblar darvozasini ishg‘ol etdi. Xulosa shuki, merganlarga yangi to‘pning qandaydir xususiyati emas, o‘zlarining mahoratlari qo‘l keldi. Turnirning «pley-off» bosqichida samaradorlik yanada pasayib ketdi - 15ta uchrashuvda 26ta gol.
Qiziq, sermahsul hujum chizig‘iga ega bo‘lgan Braziliyaning o‘rtacha ko‘rsatkichi ikkiga teng bo‘lgan, turklar darvozasiga urilgan yagona gol evaziga finalga chiqqan bir paytda to‘pning makkorona tabiati xususida gap bo‘lishi mumkinmi?
Dunyoning eng sara hujumchilari darvozabonlarga xalal berish maqsadida yaratilgan to‘plardan unumli foydalana olishmadi. Aslida aksincha manzarani taxmin qilishgandi. Posbonlarga «suiqasd» shunchaki xomxayol edimi yoki to‘plarning afsungar tabiati?
JCH-2006. Yana darvozabonlar ko‘ngli to‘lmadimi?
Darvozabonlarning bu yirik musobaqa arafasidagi e’tirozlarini tushunish birmuncha osonroq kechdi. Boisi, eski maktab vakillari tamoman yangi texnologiyaga asoslangan to‘plarga duch kelishdi.
Issiqqa chidamli choklar tufayli «snaryad»ning suv o‘tkazmaslik xususiyati sezilarli darajada oshdi. Darvozabonlarning to‘p bilan muomala qilishlari esa murakkablashdi.
Chunki Teagiest juda silliq edi, ayniqsa, suv tekkan paytlarda sirpanchiq bo‘lib qolardi. Bundan tashqari, to‘p ilk marta 14 bo‘lak olti burchakli materiallardan tayyorlangandi. Shu sababli uning parvozi beysbol to‘plarini eslatardi.
Xo‘sh, texnik taraqqiyotning navbatdagi mo‘’jizasi samaradorlikda qanday namoyon bo‘ldi? Afsuski, bu safar ham ko‘rsatkichning pasayishiga guvoh bo‘ldik - har bir uchrashuvda o‘rtacha 2,3ta gol.
Boz ustiga, «pley-off» bosqichining 15 bellashuvida darvozalarga 26ta gol urildi, 4ta kamtarona duranglardan keyin penaltilar seriyasiga murojaat qilindi, ikkita uchrashuvda tabloni yoqimsiz «teshikkulchalar» bezab turishdi.
Ikkita 3:0 hisobidagi yirik g‘alabalarni inobatga olmasak, qolgan uchrashuvlardagi mahsuldorlik 1,5ta golga tushib ketdi. Eng sara termalarga xos bo‘lmagan natija!
Ammo olis masofalardan yo‘llanadigan zarbalar borasida ijobiy o‘zgarishlar ro‘y berdi. Lamning Kosta-Rikaga, Rosiskining AQSHga urgan «zambarak» gollari, Zambrottaning Shovkovskiy darvozasiga quyidan yo‘llagan kuchli zarbasi mundialning ko‘rki bo‘ldi. Biroq bular yangi to‘pning xosiyati emas, balki futbolchilar mahoratining mahsuli edi.
Hatto Lev Yashindek darvoza qiroli ham 1962 yildagi olis zarbalar qarshisida ojiz qolgandi - aylanma harakat bilan yo‘naltirilgan to‘p doimo posbonga katta qiyinchilik tug‘dirgan. Xo‘p, mayli, FIFA asosiy urg‘uni olis zarbalarga berdi ham deylik. Unda nima uchun Germaniya mundiali golga boy bo‘lmadi?
JCH-2010. Jahon chempionatlari tarixidagi eng sifatsiz to‘p
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
