«Zenit» sardori Domeniko Krishito RT nashriga intervyu berib, suhbat chog‘ida Rossiya futboli so‘nggi yetti yilda qanchalik o‘zgargani haqida gapirdi.

— Rossiya chempionati bahslari yakunlanishiga uchta tur qoldi. Aftidan, jamoangizning ruhiy holati ko‘ngildagidek emas. «Zenit»ning YECHLga chiqishdagi raqobatchilari yaxshi o‘yin namoyish qilmoqda.

— Haqiqatan ham, oldimizda uchta muhim uchrashuv qoldi. Shundan ikkitasini asosiy raqobatchilarimiz - SSKA (intervyu mazkur uchrashuvdan oldin uyushtirilgan. «Zenit» - SSKA uchrashuvida 0:0 hisobi qayd etildi) va «Lokomotiv»ga qarshi o‘tkazamiz. Ushbu jamoalar bilan kuchli uchlikka kirish uchun jiddiy kurash olib boryapmiz. Ikkinchi o‘rindan ikki ochko ajratib turibdi.

— «Zenit»da ikki hamyurtingiz Luchano Spalletti va Roberto Manchinilar bosh murabbiy bo‘lib ishlashdi. Shubhasiz, boshqa futbolchilarga qaraganda siz bilan ko‘proq muloqot qilishadi. Bu sizga qanday ta’sir o‘tkazgan?

— Bunday mutaxassislar bilan birga ishlaganimdan faxrlanaman. Shuningdek, Andre Villash-Boash va Mircha Lucheskular haqida ham shunday deyishim mumkin. Ular ham italyan tilida gaplasha olishadi. Murabbiyning ko‘rsatmalarini yordamchi Igor Simutenkov beradi. U ham italyancha gaplasha oladi.

— Sizningcha, ayni payt Rossiya termasining eng kuchli uch nafar futbolchisi kimlar?

— Fyodor Smolov, Aleksandr Golovin va Oleg Shatov. Ular orasida Smolovni eng yaxshi deb atagan bo‘lardim.

— Rossiyadagi stadionlarning o‘zgarishini kuzatgan kamdan-kam xorijlik futbolchilardan birisiz. O‘tgan yetti yil ichida ular yangi darajaga chiqdimi?

— Rossiyaga kelganimda yosh yigit edim. Italiyaliklar boshqa mamlakatga, ayniqsa, ruslar o‘lkasiga moslashishga qiynalishadi. Lekin Sankt-Peterburgning go‘zalligini birinchi ko‘rishimdayoq bilganman. Rossiyadagi davrim Spalletti davrida boshlangan. U Italiyaning eng kuchli mutaxassislaridan biridir.

Faoliyatim shunday davom etayotganidan mamnunman. O‘tgan yetti yil davomida Rossiya futbolida ham o‘sish ko‘zga tashlandi. Kuchli futbolchilar kelishdi, chempionat saviyasi ancha oshdi. Yangi stadionlar, shunga yarasha infratuzilma - bularning barchasi Rossiya futboli rivoji uchun ishlaydi.

— Qaysi stadionda futbol atmosferasi yuqori: fanatlar, maydon, kiyinish xonasi va barchasini inobatga olganda?

— Agar «Zenit» stadionidan bosh­qasini aytadigan bo‘lsam, «Krasnodar» arenasini tanlayman. Lekin u yerda jahon chempionati o‘yinlari o‘tkazilmaydi.

— Bundan ajablandingizmi?

— Albatta. Chunki bunday darajadagi stadionlar butun jahonda ham kam.

— Rossiyadagi barcha gollaringizni eslay olasizmi?

— Ha, albatta.

— Siz uchun eng muhimi qaysi?

— Hammasidan ko‘ra «Spartak» bilan bo‘lgan o‘yinlarda urgan gollarim alohida ahamiyat kasb etadi.

— Sizningcha, Italiya termasini kim boshqarishi kerak?

— Buni Italiya futbol federasiyasining o‘zi hal qilsin. Bizning yurtda iqtidorli murabbiylar ko‘p. Shaxsan men Luchano Spalletti va Roberto Manchinilarning nomzodlarini ko‘rsatgan bo‘lardim. Lekin ularning biri «Inter», boshqasi esa «Zenit» bilan shartnomaga ega.

— Rossiyada sizni yana nima ajablantirishi mumkin yoki barchasini ko‘rib ulgurdingizmi?

— Hamma yerda insonlar har xil bo‘lishadi. Yetti yilda rus xalqi va ularning urf-odatlarini o‘rgandim, deyolmayman. Lekin odamlarni ajrata oladigan bo‘ldim.

— Sankt-Peterburgda hayratlangan insonlarga shaharda bir marta qish mavsumini o‘tkazishni maslahat berishadi. Moslashish uchun qanchalik qiynalgansiz?

— Turmush o‘rtog‘imdan ko‘ra menga osonroq bo‘lgan. Chunki o‘sha payt ilk farzandim Alfredoga homilador edi. Vaqt o‘tishi bilan o‘rganib ketdik. Migel Danni va uning rafiqasi bilan tanishganimizdan keyin yanada oson bo‘ldi. Umuman olganda, «Zenit»ga moslashishimda Dannining mehnatlari ko‘p.

— Sankt-Peterburgda Italiyani eslatadigan nimadir bormi?

— Ha, restoranlar.

— Oilangiz bilan qayerda ko‘proq vaqt o‘tkazasiz?

— Ikki farzandimiz borligi uchun asosan parklarga boramiz.

— Rafiqangiz vaziyatni o‘zgartirish vaqti keldi, demaydimi?

— O‘zgarishga na hojat? Turmush o‘rtog‘imga bu yer yoqadi.

— Xorijdagi hayot ko‘proq farzand­larga ijobiy ta’sir o‘tkazadi. Chunki ular yangi tillarni o‘zlashtirishadi. Farzandlaringiz Rossiyadan ketgandan keyin ham rus tilini o‘rganishda davom etishadimi?

— Bolalarimga turli mamlakatlardagi hayot juda yaxshi ta’sir o‘tkazdi. Ular italyan, ingliz, rus va biroz filippin tilida gaplasha olishadi. Umid qilamanki, Italiyaga qaytganimizdan keyin ham farzandlarim rus va ingliz tilini o‘rganishda davom etishadi.

— Ma’lumki, italyanlar farzandlarining istagan ishini qilishiga ruxsat berishadi. Siz ham shundaymisiz yoki biroz qattiqqo‘lroq otamisiz?

— Bolalarni jazolashda qiynalaman. Lekin ba’zan ularga «yo‘q» deb ham turish kerak. Shuningdek, hissiyotlarni jilovlab, biroz qattiqqo‘llik qilish foyda beradi.

InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.