“Lokomotiv” jamoasi 12-turda “Qizilqum”ga qarshi bahs yuritadi. Ikkinchi davraning ilk o‘yini bo‘lgani bois “temiryo‘lchilar” jamoasi mazkur qarama-qarshilikka ancha jiddiy hozirlik jarayoni olib bordi.
“Lokomotiv” himoyachisi Igor Yelich o‘yin oldidan klub rasmiy saytiga o‘z fikrlarini bildirib o‘tdi:
- “Lokomotiv” “Qizilqum”ga qarshi uchrashuvga ancha yaxshi tayyorgarlik ko‘rdi. Biz o‘z maydonimizda ishqibozlarimiz qarshisida to‘p suramiz. To‘g‘ri, o‘yin oson o‘tmasligi tayin. Lekin 3 ochkoni qo‘lga kiritishni maqsad qilgan ekanmiz, maydonda borimizni berishimiz shart. Bundan buyon xato qilishga haqqimiz yo‘q. Zero mavsum boshida xalqaro maydonda ham o‘yinlarimiz borligi sababli ba’zi uchrashuvlarda ko‘zlangan maqsadga yeta olmadik. Biroq endi barchasi o‘z o‘rniga tushmoqda. Hali “Lokomotiv” o‘z muxlislarini chiroyli g‘alabalar bilan xushnud etadi va albatta 1-pog‘onaga qaytadi, - dedi mahoratli himoyachi klub matbuot xizmati bilan suhbatda.
