27 may kuni Vyetnamning Xoshimin shahrida bo‘lib o‘tgan Osiyo chempionatida sovrindor bo‘lgan parataekvondochilarimiz yurtimizga qaytib kelishdi. Sportchilarni Islom Karimov nomidagi Toshkent xalqaro aeroportida Milliy olimpiya qo‘mitasi va O‘zbekiston taekvondo WTF federasiyasi mutasaddilari, murabbiylar, sportchilarning yaqinlari va ommaviy axborot vositalari kutib olishdi.

Eslatib o‘tamiz, musobaqada sportchilarimizdan Farxodjon Mamaziyoyev va Guljanoy Naimova oltin, Sanjarbek Muxtorov kumush va Ziyodaxon Isoqova bronza medallarini qo‘lga kiritishdi.

"Avvalambor davlatimizga, Prezidentimizga minnatdorchilik bildiraman. Vyetnamda o‘tkazilgan Osiyo chempionatida +58kg vazn toifasida yurtimiz sharafini himoya qildim. Paralimpiya o‘yinlariga reyting ochkolar taqdim etuvchi ushbu musobaqada Janubiy Koreya, Nepal kabi mamlakatlar vakillarini mag‘lubiyatga uchratdim. Finalda esa olti karra jahon chempioni hisoblangan raqibimdan ustun keldim. Shu tariqa musobaqaning eng yaxshi sportchisi deb e’tirof etildim. Taqdirlash marosimida "Naimiova Guljanoy, O‘zbekiston" deb e’lon qilishganida juda hursand bo‘ldim va ko‘z yoshlarimni yashira olmadim. G‘olib bo‘lganimdan xursandman", - dedi musobaqaning eng yaxshi sportchisi deb topilgan hamyurtimiz Naimova Guljanoy.