Rossiyada boshlanadigan futbol bo‘yicha jahon chempionati mamlakat aholisi uchun qo‘shimcha daromad manbaiga aylanishi kutilmoqda.
 
Hozirning o‘zida shaharlardagi mehmonxonalar mundialni jonli tomosha qilish uchun kelgan muxlislar tomonidan to‘lib bo‘ldi. Shu bois, fursatni qo‘ldan boy bermagan ayrim rossiyaliklar uyini ijaraga berib, o‘zlari sayohatga otlanishni rejalashtirib turibdi.
 
Ayniqsa, bu holat millionlar o‘yiniga xushi yo‘q hamda uy-joylari jahon chempionati bahslari o‘tkaziladigan stadionlarga yaqin rus oilalari orasida ko‘p kuzatilmoqda.
 
Ular bir kunlik ijara haqini uy sharoitidan kelib chiqib, 600 dollardan 1000 dollargacha baholagan. Mehmonxonaga joylasha olmagan chet ellik futbol ishqibozlari uchun bu ayni muddao bo‘lmoqda.
 
Kelishilgan pulning yarmini oldindan olgan mezbonlar esa, maza qilib hordiq chiqarish uchun Turkiya, Kipr yoki bo‘lmasa bahavo maskanlarga yo‘l olmoqda. Hisob-kitoblarga ko‘ra, mingdan ortiq rus xonadonlari uylarini ijaraga berib bo‘lishgan.
 
Ma’lumot o‘rnida, JCH-2018 final bosqichi 2018 yilning 14 iyunidan 15 iyuliga qadar Rossiyaning Moskva, Sankt-Peterburg, Qozon, Sochi, Nijniy Novgorod, Samara, Kaliningrad, Yekaterinburg, Saransk, Volgograd va Rostov na-Donu shaharlaridagi stadionlarda bo‘lib o‘tadi.