Germaniyaning Zul shahrida yoshlar o‘rtasida o‘q otish bo‘yicha Jahon kubogi o‘tkazilmoqda. E’tiborli tomoni, ushbu nufuzli musobaqada iqtidorli sportchimiz, O‘zbekiston chempionati va kubogi g‘olibi Zaynab Pardaboyeva ham ishtirok etmoqda.
Hamyurtimiz pnevmatik miltiqda 10 metrli nishonga o‘q otish bo‘yicha o‘tgan VP-6 mashqida 621,4 natijani qayd etib, o‘zining shaxsiy rekordini yangiladi. Bu natija ayollar o‘rtasida O‘zbekiston rekordi hisoblanadi. Shu vaqtga qadar O‘zbekiston rekordi London olimpiadasi ishtirokchisi Sakina Mamedovaga (620,6 natija) tegishli edi.
Ma’lumot uchun, ayollar o‘rtasidagi VP-6 mashqida sportchilar 1 soat 15 daqiqa ichida ketma ket 60 ta o‘qni nishonga otishlari lozim.
