Xabaringiz bor, Janubiy Koreyaning Jeju shahrida taekvondo WTF bo‘yicha reyting musobaqasi boshlandi.

Bugun o‘smirlar o‘rtasidagi bahslar boshlandi. Bellashuvlarda -45kg vazn toifasida yurtimiz sharafini himoya qilgan Amirbek To‘rayev uchinchi o‘rinni egalladi.

Hamyurtimiz yuqori reytingga ega bo‘lganligi sababli (o‘z yosh toifasida jahon reytingida ikkinchi o‘rin) musobaqani ikkinchi davradan boshladi. U ilk jangida rossiyalik sportchini 23:1 hisobida mag‘lubiyatga uchratdi. Yarim finalda esa tailandlik raqibga bir ochko farqi bilan (8:9) imkoniyatni boy berib qo‘ydi. Shu tariqa hamyurtimiz musobaqada bronza medali bilan kifoyalandi.

Bugun faqat Amirbek To‘rayev musobaqada ishtirok etdi. Ertadan boshlab esa qolgan sportchilarimiz o‘z imkoniyatlarini sinovdan o‘tkaza boshlaydilar.

Eslatib o‘tamiz, musobaqada birinchi o‘rinni qo‘lga kiritgan sportchi 20 reyting ochkosiga ega bo‘ladi. Ikkinchi va uchinchi o‘rinni qo‘lga kiritgan sportchilar esa mos ravishda 12 va 8 ochkoni o‘z hisoblariga qo‘shib qo‘yishadi.