Hindistonning Nyu-Dehli shahrida sport kurashlari bo‘yicha yoshlar o‘rtasidagi Osiyo chempionati davom etmoqda. Kecha musobaqada yunon-rum kurashi bo‘yicha bellashuvlarda to‘rt nafar sportchimiz shohsupaga ko‘tarilishga muvaffaq bo‘lgandi.

Bugun esa ayollar kurashida yana bir medal qo‘lga kiritdik. Musobaqada -59kg vazn toifasida yurtimiz sharafini himoya qilgan Nabira Yesenbayeva dastlab hindistonlik Sangita Sangitani (2:1), xitoylik Juanjuan Shini (10:7) mag‘lub etib, finalga yo‘l oldi. Hal qiluvchi bahsda esa u yaponiyalik Yuzuru Kumanoga qarshi bahs yuritdi va 4:10 hisobida imkoniyatni boy berib qo‘ydi.

Shu tariqa, Nabira yoshlar o‘rtasidagi Osiyo chempionatining kumush medali bilan kifoyalandi.