Bugun, 19 avgust kuni Indoneziya poytaxti Jakarta shahrida Osiyo Olimpiya kengashining 37-Bosh assambleyasi bo‘lib o‘tdi. Unda O‘zbekiston nomidan Milliy olimpiya qo‘mitasi Prezidenti Umid Ahmadjonov va Bosh kotib Jasur Matchanov ishtirok etdi.
Yig‘ilishni Osiyo Olimpiya kengashi prezidenti shayx Ahmad al-Fahad al-Ahmad al-Sabah o‘z ma’ruzasi bilan ochib berdi. So‘ngra 2022 yili Xitoyning Hangjou shahri mezbonlik qiladigan Osiyo o‘yinlari va 2026 yili Yaponiyaning Ayti-Nagoya prefekturasida bo‘lib o‘tadigan Osiyo o‘yinlari, 2020 yilgi Tokio yozgi olimpiadasi va 2022 yilgi Pekin qishki olimpiadasi taqdimoti o‘tkazilgan, shuningdek, turli federasiyalar rahbarlari taqdirlangan.
Milliy olimpiya qo‘mitasi rahbari Umid Ahmadjonov yig‘ilish davomida Osiyo Olimpiya kengashi prezidenti shayx Ahmad al-Fahad al-Ahmad al-Sabah bilan ham uchrashdi va bir qator masalalarni muhokama qildi.
Assambleyada Osiyo olimpiya kengashi vise-prezidenti, Xalqaro havaskor boks assosiasiyasi (AIBA) prezidenti vazifasini bajaruvchi G‘ofur Rahimov ham qatnashdi.
