Indoneziyaning Jakarta va Palembang shaharlarida o‘tkazilgan XVIII Osiyo o‘yinlarida Buxoro viloyatidan 6 sportchi ishtirok etib, ularning to‘rt nafari Vatanga sovrindor bo‘lib qaytdi.
Buxoro viloyat hokimligi tomonidan yozgi Osiyo o‘yinlari qatnashchilarini qutlash marosimi tashkil etildi. Unda viloyat davlat va jamoat tashkilotlari vakillari, sportchilar va ularning yaqinlari, yoshlar ishtirok etib, nufuzli musobaqada yuqori natijalarga erishgan sportchilarni g‘alaba bilan qutlashdi.
Milliy kurash musobaqalarida 66 kilogramm vaznda gilamga tushgan Ma’ruf G‘aybullayev finalgacha bo‘lgan barcha bahslarda raqiblaridan kuchli ekanini isbotladi. Hal qiluvchi bellashuvda u terma jamoaning yana bir a’zosi Ruslan Berdiyevdan ustun kelib, oltin medal bilan taqdirlandi.
Buxoro olimpiya zaxiralari maktab-internati tarbiyalanuvchisi, milliy kurashchi Nurbek To‘rayev, mazkur muassasaning yana bir vakili sambochi Ahmadjon Rahmatullayev, erkin kurashchi Siroj Hasanov shohsupaning uchinchi pog‘onasidan o‘rin egalladi. Yengil atletikachi Nigina Sharipova va dzyudochi Shahram Ahadovga esa bronza medali uchun bahslarda bir oz omad yetishmadi.
“G‘alabam sharafiga Vatanimiz bayrog‘i ko‘tarilib, madhiyamiz yangraganda menda ro‘y bergan hayajon va ko‘nglimda kechgan tuyg‘ularni ta’riflay olmayman. Bu hisni faqat shunday nufuzli musobaqada shohsupaga ko‘tarilgan kishigina tuyadi, menimcha, deydi Ma’ruf G‘aybullayev.
– Bizning bu yutuqlarimiz zamirida mamlakatimizda yoshlar uchun yaratilgan keng sharoit va imkoniyatlar yotadi. Qolaversa, ota-onamiz, ustozlarimizning ta’lim-tarbiyasi, xalqimizning qo‘llab-quvvatlashi muhim ahamiyat kasb etdi. Shuning uchun bu g‘alabamni jonajon O‘zbekistonimizning Mustaqillik bayramiga bag‘ishlayman.
Marosimda sovrindor sportchilarga qimmatbaho sovg‘alar topshirildi. Osiyo o‘yinlari oltin medal sovrindori Ma’ruf G‘aybullayevga viloyat hokimligi tomonidan Qorako‘l tumani “Do‘rmon” qishloq massivida zamonaviy loyihalar asosida barpo etilgan ikki sotix yer maydoniga ega uch xonali uy sovg‘a qilindi.
