Pepsi Superliga 29-turida “So‘g‘diyona” o‘z maydonida AGMK ni qabul qildi va 1:0 hisobida g‘alaba qozondi. Uyindan so‘ng AGMK bosh murabbiyi Baxtiyor Ashurmatov va o‘yinning eng yaxshi futbolchisi deb topilgan Lutfulla To‘rayev matbuot anjumanida ishtirok etdi.
"O‘yinga kirishib ketishimiz uchun bizga 45 daqiqa kerak bo‘ldi. Raqib jamoa gol kiritmaguncha bizning futbolchilar yaxshi o‘yin ko‘rsata olishmadi. Ikkinchi bo‘lim davomida hujumkor futbol ko‘rsatishga harakat qildik. Afsuski, hisob 1:0 ligicha qoldi. O‘yinning boshidan 100% tayyorgarlik bilan chiqmaganimiz o‘z so‘zini aytdi va “So‘g‘diyona” g‘alaba qozondi. “So‘g‘diyona”ni tabriklayman. O‘zbekiston Kubogini yutdi degani bu hayot tugadi degani emas. Jamoa yoki futbolchi kuchli ekanligini har bir o‘yinda isbotlash kerak. O‘ylaymanki, yigitlar bugungi mag‘lubiyatdan to‘g‘ri xulosa chiqargan holda “Qo‘qon-1912” ga qarshi bahsda tamomila boshqacha o‘yin namoyish etadi", — deydi Baxtiyor Ashurmatov.
"Bugun ikkala jamoa ko‘rsatgan o‘yin durangga mos bo‘ldi. Birgina xato bizga qimmatga tushdi va So‘g‘diyona g‘alaba qozondi. Oldinda 3ta o‘yin bor. Bu o‘yinlardagi qo‘lga kiritilgan har bir ochko oltingga teng. Keyingi o‘yinlarda g‘alaba qozonishga harakat qilamiz", — deydi Lutfulla To‘rayev.
“So‘g‘diyona” PFK matbuot xizmati
