«Bavariya» joriy mavsum barqaror natija ko‘rsatolmayapti. Boz ustiga, jamoa ichidagi vaziyat ham yaxshi emas, chog‘i. Bosh murabbiy Niko Kovachni hamma tanqid bilan «siylamoqda», hattoki, futbolchilarning turmush o‘rtoqlari ham bu jarayondan chetda qolishmayapti.

Misol uchun Tomas Myullerning hamxonasi Liza xonim Bundesliga 10-turidan o‘rin olgan «Bavariya» - «Frayburg» o‘yini (1:1)dan so‘ng xorvatiyalik mutaxassisga oshkora e’tiroz bildirdi. Unga erining 70-daqiqaga qadar zaxira o‘rindig‘ida qolib ketgani aslo yoqmagan ko‘rinadi.

Liza Myuller o‘z alamini «Instagram» tarmog‘i vositasida to‘kib-sochdi: «Uning (Niko Kovach nazarda tutilgani o‘z-o‘zidan ayon)hammaga ayon haqiqatni anglashiga qadar 70 daqiqa o‘tib ketdi».  Xullas, Liza erining zaxiradan o‘yinga qo‘shilgan vaqtini shunday izohladi. To‘g‘ri, u keyinroq yozuvlarni o‘chirib tashladi.

Niko Kovach missis Myullerning istehzosiga qandaydir munosabat bildirgani yo‘q, Tomas esa oddiy izoh berdi: «Ha, Liza nimalar yozganini aytishdi. Menimcha, bu shunchaki, ehtiros natijasida yuzaga chiqqan reaksiya.

To‘g‘ri, turmush o‘rtog‘im bunday keskin fikr bildirmasligi kerak. Har holda, barchasini shu tariqa bayon etish yaramaydi. Biroq Liza meni yaxshi ko‘rgani va azbaroyi achinganidan shunday yo‘l tutganki, unga qarshi nima ham qila olardim...?»

Klubda esa Myuller xonimning izohini ancha jiddiy qabul qilishdi. Xususan, «Bavariya» rasmiy saytida alohida bayonot ham berildi. Vaholanki, odatda bunday voqeliklar mutlaqo e’tiborsiz qoldirilardi.

«Tomas Myullerning turmush o‘rtog‘i Liza Bundesliga doirasida «Frayburg»ga qarshi kechgan va 1:1 hisobida tugagan o‘yindan keyinoq «Alyans Arena» stadionida murabbiy Niko Kovachni qidirib topdi va «Instagram»da erining 70-daqiqagacha zaxirada qolgani yuzasidan bildirgan fikri uchun uzr so‘radi. Kovach uni to‘g‘ri tushundi», - deyiladi klub bayonotida.

Biroq voqeaning uzviy davomi o‘laroq, Liza Myuller keyinroq Tomasning «Instagram»dagi barcha fotosuratlarini o‘chirib tashladi. O‘z o‘rnida qo‘shimcha ma’lumot berish joiz: Tomas va Liza 2009 yili oila qurishgan. Lizaning professional chavandoz ekanligini ham aytish o‘rinli.