Futbol qoidalari bilan shug‘ullanadigan assosiasiya (IFAB) futbol qoidalariga bir nechta o‘zgarishlar kiritishni taklif qildi.

1. Zaxiraga olinayotgan futbolchi maydonni texnik hududdan emas, maydonning o‘ziga yaqin istalgan joyidan tark etishi kerak. Bu orqali tashkilot futbolchi almashtirishga ketadigan vaqtning qisqarishiga erishmoqchi.

2. O‘yindan keyin penaltilar seriyasini topish formatini o‘zgartirish taklif qilinyapti. 11 metrlik jarima zarbalarini jamoalar navbati bilan emas, "ABBA" sxemasi asosida tepishadi. Ya’ni birinchi jamoa dastlab bitta zarba beradi, uyog‘iga har bir jamoa 2 martadan zarba beradi. Oxirida ikkinchi jamoa bitta zarba bilan penaltilar seriyasiga yakun yasaydi.

3. Qo‘l bilan o‘ynash qoidasiga yanada aniqlik kiritish.

4. "Bahsli to‘p" qoidasini o‘zgartirish.

5. Penalti tepish jarayonida posbonlarning faqat bir oyog‘i darvoza chizig‘i ustida bo‘lishi kifoya.

6. Darvoza oldidan to‘pni erkin zarba bilan o‘yinga kiritish paytida to‘p jarima maydonchasini tark etishi shart emas.

7. Texnik zonadagi rasmiy shaxslar sariq va qizil kartochkalar bilan jazolanishi mumkin.

Ushbu o‘zgarishlar 2019 yilning mart oyida qabul qilinishi mumkin.