2018 yilning oktyabr oyida Indoneziya poytaxti Jakarta shahrida o‘tkazilgan III Paraosiyo o‘yinlarida sovrindor bo‘lgan sportchilar pul mukofoti bilan taqdirlanadi. Bu haqda Bu Jismoniy tarbiya va sport vazirligi matbuot xizmati ma’lum qildi.
Manbaga ko‘ra, 4 dekabr kuni O‘zbekiston Prezidenti Shavkat Mirziyoyevning sportchilarni mukofotlash to‘g‘risida farmoyishi imzolangan.
Unga ko‘ra, Paraosiyo o‘yinlari oltin medali sohiblari 5000, kumush medal sovrindorlari 3000, bronza medaliga ega chiqqan sportchilar esa 2000 AQSH dollari miqdoridagi mukofot puli bilan taqdirlanadi.
Ushbu pul mukofotlari III Paraosiyo o‘yinlarida g‘olib va sovrindorlarni taqdirlash uchun tashkil etiladigan taqdirlash marosimida o‘z egalariga topshiriladi.
O‘zbekiston paralimpiya terma jamoasi musobaqada 35 oltin, 24 kumush va 18 bronza, jami 77 ta medalni qo‘lga kiritib, umumjamoa hisobida kuchli beshlikdan o‘rin egallagan. O‘zbekiston delegasiyasi musobaqada 54 nafar sportchi bilan ishtirok etib, musobaqa tarixidagi eng yaxshi natijani qayd etgan.
