Toshkentdagi muz saroyining qurilishi yakuniga yetay deb qoldi. “Tez orada muz ustida uchish mumkin bo‘ladi”, — degan izoh bilan, saroy qurilishidan suratlarni bosh vazir o‘rinbosari Aziz Abduhakimov e’lon qilgan.
Toshkent markazida, Beshyog‘och dahasi yaqinida Humo Arena ko‘p tarmoqli muz saroyini qurish ishlari reja bo‘yicha 2018 yilning 31 dekabrigacha yakunlanib, foydalanishga topshirilishi kerak edi (lekin bu muddatda emas, balki “tez orada” foydalanishga topshiriladi — xuddi “Amirsoy” kabi).
Majmuada o‘lchamlari 60×30 metr bo‘lgan ikkita — asosiy va mashq muz arenalari rejalashtirilgan bo‘lib, bino umumiy maydoni 74 ming kvadrat metrni tashkil qiladi, bino to‘rt qavatdan iborat, balandligi esa 36 metrni tashkil etadi.
Muz saroyi 12,5 ming o‘tirish joylariga ega va konsert zali sifatida 10 ming, sport musobaqalar o‘tkazish zali sifatida esa 14 ming tomoshabinga mo‘ljallangan. Asosiy binoda 300 o‘rinlik mashq arenasi ham loyihalashtirilgan.