Тошкентдаги муз саройининг қурилиши якунига етай деб қолди. “Тез орада муз устида учиш мумкин бўлади”, — деган изоҳ билан, сарой қурилишидан суратларни бош вазир ўринбосари Азиз Абдуҳакимов эълон қилган.

Тошкент марказида, Бешёғоч даҳаси яқинида Humo Arena кўп тармоқли муз саройини қуриш ишлари режа бўйича 2018 йилнинг 31 декабригача якунланиб, фойдаланишга топширилиши керак эди (лекин бу муддатда эмас, балки “тез орада” фойдаланишга топширилади — худди “Амирсой” каби).

Мажмуада ўлчамлари 60×30 метр бўлган иккита — асосий ва машқ муз ареналари режалаштирилган бўлиб, бино умумий майдони 74 минг квадрат метрни ташкил қилади, бино тўрт қаватдан иборат, баландлиги эса 36 метрни ташкил этади.

Муз саройи 12,5 минг ўтириш жойларига эга ва концерт зали сифатида 10 минг, спорт мусобақалар ўтказиш зали сифатида эса 14 минг томошабинга мўлжалланган. Асосий бинода 300 ўринлик машқ аренаси ҳам лойиҳалаштирилган.