Zamonaviy futbolda omadsiz xaridlar tobora ko‘payib bormoqda. Lekin grandlar transferlarda kam xato qilishadi. Ammo guruch kurmaksiz bo‘lmaydi, deganlardek top-klublar ham bazida xato qilishadi. O‘tayotgan mavsumdagi eng omadsiz transferlarning bir nechtasini eslatib o‘tamiz.
Rashid G‘azzol. 14 million yevro. «Monako»dan – «Lester»ga
«Tulkilar» Mahrez o‘rnini shu yo‘l bilan to‘ldirshmoqchi bo‘lishgandi. Afsuski, G‘azzol 14 millionni oqlay olmadi. Uning texnikasi va maydondagi pozisiyasi Riyod bilan bir hil bo‘lishi mumkin, lekin Mahrezning o‘rnini bosish, hozircha, uning qo‘lidan kelmayapti. O‘tgan yarim mavsum davomida futbolchi asosiy tarkibdagi o‘rnini to‘liq boy berib bo‘ldi.
Tibo Kurtua. 35 million yevro. «Chelsi»dan – «Real Madrid»ga
Kurtua «Chelsi»ni tark etishni juda ham xohladi va bunga erishdi. Afsuski, uning «Real»dagi ilk mavsumi tarqoqlik davriga to‘gri kelib qoldi. Murabbiy o‘zgardi - taktika o‘zgardi. Kurtua qo‘lidan kelgan hamma narsani qilayotgandek tuyulishi mumkin, lekin «Chelsi»dagi ishonchli o‘yinlarini darvozabon deyarli yo‘qotib bo‘ldi. Afsuski, muxlislar ishonchi ham tobora kamayib bormoqda.
Malkom. 41 million yevro. «Bordo»dan – «Barselona»ga
Yosh braziliyalik futbolchi o‘ylaganimizdan ancha sekinroq jamoaga moslashmoqda. To‘g‘risi, uning transfer summasidagi raqamlar muxlislarga ko‘prog‘ini va’da qilayotgandek edi, go‘yo. Ammo Malkom o‘yinlarda yo‘qolib qolmoqda. Sekin-astalik bilan zaxiraga qulayroq joylashib olishiga to‘g‘ri keladi. Sababi, «Barsa» hech kimga ikkinchi imkonni bermaydi. Bunday «katta» jamoalarda hatto superyulduzlarning ham o‘rni kafolatlanmagan. Lekin Malkomnnig yoshini inobatga olsak, hali unda imkon bo‘lsa, ajab emas.
Fred. 59 million yevro. «Shaxtyor»dan –«Manchester Yunayted»ga
Afsuski, «benazir»ning omadsiz xaridlaridan yana biri. Fred deyarli asosiy tarkibdan umidini uzib qo‘ygandi. Tajovuzkor va universal yarim himoyachi «tumanli albion» yashil maydonlariga katta umidlar bilan kelgan edi. Afsuski, uning ilk mavsumdagi ishlari yurishmayapti. Birorta assistni amalga oshira olmagan Freddan muxlislarning ham ko‘ngli sovib ketdi. Lekin, endigina 25 yoshni qarshilagan Fred uchun hali hammasi oldinda bo‘lishi mumkin. Uning hamma umidi Sulsherdan.
