Yangi mavsumga tayyorgarlik rejasi doirasida “Dinamo” jamoasi navbatdagi uchrashuvlarni o‘tkazadi.

O‘tgan haftada Toshkentda “Metallurg” va “Bunyodkor”ga qarshi nazorat bahsida maydonga tushgan samarqandliklar, bu safar Navoiy va Qarshi shaharlariga safar etadi.

Klub matbuot xizmatining ma’lumot berishicha, ayni damda Samarqandda mashg‘ulotlar olib borayotgan “Dinamo” klubi 1 fevral kuni Navoiy shahrida mahalliy “Qizilqum” klubiga qarshi nazorat bahsida maydonga tushadi.

2 fevral kuni esa “Dinamo”ni Qarshida yana bir Superliga vakili “Nasaf” bilan o‘rtoqlik uchrashuvi rejalashtirilgan.

Ushbu bahsdan so‘ng jamoaga uch kunlik dam berilib, 6 fevral kunidan “Dinamo” yana Toshkentda o‘quv-mashg‘ulot yig‘inini o‘tkazadi. Ikki haftalik yig‘in doirasida bir qator nazorat bahslari va yangi futbolchilarni ko‘rikdan o‘tkazish ko‘zlangan.