Butun sport jamoatchiligining e’tibori kelasi yili Yaponiya poytaxtiga qaratilishi aniq. 2020 yilning 24 iyul sanasida kun chiqar yurt poytaxti XXXII yozgi Olimpiya o‘yinlarini qabul qiladi. Bugun mazkur Olimpiada startiga roppa-rosa 500 kun qoldi.
O‘zbekiston Respublikasi Prezidentining 2017 yil 9 martdagi “O‘zbekiston sportchilarini 2020 yil Tokio shahri (Yaponiya)da bo‘lib o‘tadigan XXXII yozgi Olimpiya va XVI Paralimpiya o‘yinlariga tayyorlash to‘g‘risida”gi PQ-2821-son qaroriga muvofiq Milliy Olimpiya qo‘mitasi katta hajmdagi ishlarni amalga oshirmoqda. Turli sport turlarida vakillarimiz Tokio Olimpiadasiga qimmatli reyting ochkolarini yig‘ib kelishmoqda.
Nasib qilsa, yana bir yildan so‘ng bo‘lib o‘tadigan Olimpiya o‘yinlarida O‘zbekiston terma jamoasi Rio-de-Janeyrodagidan ham yuqori natijalarni qayd etib, yurtdoshlarimizga unutilmas g‘alabali onlarni taqdim etishadi.