Xabaringiz bor, 19-26 aprel kunlari Tailand poytaxti Bangkok shahrida boks bo‘yicha Osiyo chempionati bo‘lib o‘tdi.

Musobaqada qit’amizning 34 mamlakatidan 300 nafardan ziyod charm qo‘lqop ustasi sovrinli o‘rinlar uchun kurash olib bordi. Erkaklar o‘rtasidagi musobaqada 192 nafar, ayollar o‘rtasidagi bellashuvlarda esa 112 nafar sportchi ishtirok etdi.

Bahslarda yurtimiz sharafini 19 nafar sportchi (shulardan 10 nafari erkaklar, 9 nafari ayollar) himoya qildi.

Bangkok mezbonlik qilgan qit’a birinchiligi vakillarimiz uchun omadli keldi. Terma jamoamiz a’zolari bahslarda 4 ta oltin, 1 ta kumush va 4 ta bronza medallariga sazovor bo‘lishdi.

Osiyo chempionatida Nodirjon Mirzahmedov (-49 kg), Mirazizbek Mirzahalilov (-56 kg), Bobousmon Baturov (-69 kg) va Bahodir Jalolov (+91 kg) oltin medalga ega chiqishdi. Sanjar Tursunov (-91 kg) esa kumush medal sohibiga aylandi. Shukurjon Rahimov (-60 kg), ayollar o‘rtasida esa Yodgora Mirzayeva (-57 kg), Maftuna Meliyeva (-64 kg) va Shaxnoza Yunusova (-69 kg) bronza medalini qo‘lga kiritishdi.

Erkaklar o‘rtasidagi bahslar yakuniga ko‘ra, yigitlarimiz umumjamoa hisobida birinchi o‘rinni egallashdi. Musobaqada o‘zbekistonlik bokschilardan tashqari Qozog‘iston 2 ta, shuningdek Hindiston, Mo‘g‘uliston, Tojikiston hamda Janubiy Koreya vakillari bittadan oltin medalni qo‘lga kiritdilar.

Ayollar va erkaklar o‘rtasidagi bahslarni qo‘shib hisoblaganda 6 ta oltin medal qo‘lga kiritgan Xitoy vakillari umumjamoa hisobida birinchi bo‘lishdi. Qayd etish lozimki, ushbu 6 ta medalning barchasi ayollar hissasiga to‘g‘ri keladi. Umumjamoa hisobida kuchli uchlikka 2 ta oltin, 4 ta kumush va 7 ta bronza qo‘lga kiritgan Hindiston vakillari yakun yasashdi.

Ma’lumot uchun, musobaqada qatnashgan 34 mamlakatdan 16 tasi Osiyo chempionatida medallar jamg‘ara oldi. 18 mamlakat bokschilari esa o‘z yurtlariga medalsiz qaytib ketishdi.