27 aprel kuni Toshkent shahridagi “Obod” stadionida futbol bo‘yicha poytaxtimizda faoliyat ko‘rsatayotgan xususiy maktablar o‘quvchilari o‘rtasida musobaqa bo‘lib o‘tdi.

“Junior” xalqaro futbol maktabi tomonidan tashkil etilgan “Junior xususiy maktablar ligasi”turnirida poytaxtimizdagi 10 ta xususiy maktab o‘quvchilaridan tarkib topgan 50 ta jamoa maydonga tushdi.

O‘yinlar yosh toifalari (1-7 sinflar)ga bo‘lingan holda o‘tkazildi.

O‘yinlarni tomosha qilish uchun kelgan o‘quvchilarning oila a’zolari va yaqinlari yosh iqtidor egalarini qo‘llab-quvvatlab turishgani bolalarga qo‘shimcha kuch-quvvat bag‘ishladi.

Qizg‘in bahslarga boy kechgan turnir yakunida quyidagi jamoalar o‘z guruhlarida birinchi o‘rinni qo‘lga kiritishdi:

1-sinflar o‘rtasida - “Sehriyo”

2-sinflar o‘rtasida - “Genesis Education”

3-sinflar o‘rtasida - “The British school of Tashkent”

4-sinflar o‘rtasida - “The British school of Tashkent”

5-sinflar o‘rtasida - “Erudite Education school”

6-sinflar o‘rtasida - “Lidersad-shkola”

7-sinflar o‘rtasida - “Lidersad-shkola”

G‘oliblikni qo‘lga kiritgan jamoalar kubok, medal va faxriy yorliqlar bilan taqdirlanishdi.Musobaqaning ochilish va yopilish marosimida namoyish etilgan yorqin musiqiy-shou dasturi ham barchada iliq tassurot qoldirib, yig‘ilganlarga ko‘tarinki kayfiyat baxsh etdi.