Sentyabr oyining so‘ngida Toshkent katta professional boks kechasiga mezbonlik qilishi haqida xabar bergandik. Mazkur boks kechasi bo‘yicha bir qator yangiliklar ma’lum bo‘ldi.
O‘zbekiston professional boks federasiyasi vakillarining GoSport.uz internet-nashriga ma’lum qilishicha, 29 sentyabr kuni bo‘lib o‘tadigan mazkur boks kechasida professional boksning super yengil (-63,5 kg) vazn toifasida ringga chiqayotgan Shohjahon Ergashev (17-0, 15 KO) ham o‘zining navbatdagi jangini o‘tkazadi. Hozircha unga kim raqiblik qilishi ma’lum emas.
Shuningdek, mazkur boks oqshomida beshta vazn toifasida ko‘p karra jahon chempioni afsonaviy Roy Jons (66-9, 47 KO) ham faxriy mehmon sifatida ishtirok etishi ko‘zda tutilgan.
Eslatib o‘tamiz, oldinroq mazkur boks oqshomida o‘zbekistonlik yulduz bokschilar Fazliddin G‘oyibnazarov (7-1, 4 KO), Bahodir Jalolov (6-0, 6 KO), Ulug‘bek Haqberdiyev (6-0, 4 KO), Sanjar Tursunov (1-0, 1 KO) Jamshidbek Najmiddinov (13-1, 10 KO) va boshqa bir qator bokschilar ringga chiqishi haqida ma’lum qilingandi.
