"O‘lim guruhi" nomini olgan "F" guruhida biroz avval "Inter" o‘z maydonida "Slaviya" bilan durang o‘ynagan edi. Shu bois, Dortmundning "Borussiya" klubi va "Barselona" o‘rtasidagi o‘yin g‘olibi guruhda peshqadamlikni o‘z qo‘liga olishi mumkin.

O‘yin boshida "ko‘k-anorranglilar" tashabbusni o‘z qo‘llarida ushlab turishdi, ammo mezbonlarning qarshi hujumlari xavfli bo‘ldi. Jumladan, Roys yakkama-yakka vaziyatda ter Shtegenni dog‘da qoldira olmadi. O‘yin ushbu futbolchilar o‘rtasidagi to‘qnashuvlar bilan yodda qoldi.

Ikkinchi bo‘limda dortmundliklar ma’lum muddat tashabbusga ega bo‘lishdi. Nelson Semeduning xatosi tufayli "Borussiya" penalti ishladi. Ammo Marko Roys bu safar ham "Barsa" posbonini dog‘da qoldira olmadi.

Ernesto Valverde 60-daqiqaga kelib maydonga Lionel Messi va Ivan Rakitichni tushirdi. Ammo bu holat kataloniyaliklarning o‘yiniga ijobiy ta’sir ko‘rsatmadi.

Aksincha, zaxiradan maydonga tushgan Yulian Brandtning zarbasidan keyin to‘p "Barselona" darvozasi to‘siniga tegib qaytgan bo‘lsa, Roys tomonidan ikki marta yo‘llangan xavfli zarbalarni ter Shtegen bartaraf etdi.

Mazkur durang tufayli "F" guruhida barcha jamoalar o‘z hisoblariga 1 ochkodan yozib qo‘yishdi.

«F» guruhi, 1-tur
BORUSSIYA D Germaniya – BARSELONA Ispaniya - 0:0
Borussiya D – Byurki, Xakimi, Akandji, Xummels, Gerreyru, Vitsel, Dileyni, Azar (Brandt, 73), Roys, Sancho, Pako Alkaser (Bruun Larsen, 87).
Barselona – ter Stegen, Semedu, Pike, Langle, Alba (Serji Roberto, 40), Artur, Buskets (Rakitich, 60), de Yong, Fati (Messi, 59), Suares, Grizmann.
Ogohlantirishlar: Dileyni (15), Azar (47), Pike (50), Semedu (55), Rakitich (70).