«Rostov» va O‘zbekiston terma jamoasi hujumchisi Eldor Shomurodov faoliyatini Turkiya chempionatida davom ettirishi mumkin.
«Rostov» klubidagi moliyaviy muammolar sababli, jamoa o‘z to‘purari Eldor Shomurodovni transferga qo‘yishi mumkinligi haqidagi xabarlar tarqalgan edi.
Turkiyaning "Hurriyet" nashrining xabar berishicha, joriy mavsumda hujumchiga yolchimayotgan «Galatasaroy» klubi Eldor Shomurodovga qiziqish bildirmoqda. Klub mavsum boshida o‘z safiga qo‘shib olgan ikki hujumchi – kolumbiyalik Radamel Falkao va ruminiyalik Florin Andonening o‘yinidan qoniqmayapti. Turkiya Superligasining amaldagi chempioni O‘zbekiston terma jamoasi hujumchisini qishki transfer oynasida qo‘shib olmoqchi.
Ma’lumot uchun, Falkao mavsum boshidan buyon 5 o‘yinda bor yo‘g‘i 1 ta gol urgan.
Eslatib o‘tamiz, oldinroq SSKA Shomurodov uchun 5 million taklif etayotgani haqida xabar chiqqan bo‘lsa, ko‘p o‘tmay «Sovetskiy Sport» nashri Shomurodov uchun kurashda «Zenit» favorit ekanligi haqida yozgandi.
