"Tottenxem" klubi va Angliya terma jamoasi hujumchisi Xarri Keyn jarohatidan tiklanishi uchun avval xabar berilganiga nisbatan ko‘proq vaqt ketishi mumkin. Bu haqda angliyalik jarroh Kris Uilson xabar tarqatdi.

"Uning olti oydan keyin safga qaytishi kutyapman. Agar men u bilan gaplashganimda, uni chalg‘itmaslik uchun aniq aytgan bo‘lardimki, operasiyadan 6 oy o‘tib u o‘ynashga tayyor bo‘lishi mumkin.

Keyn aprel yoki may oyida maydonga qaytishi mumkin, degan gaplarni eshitdim. Agar bu vaqtda u mashg‘ulotlarga qaytsa, bunga hayron bo‘lardim. Muddatidan erta qaytish jarohatning takrorlanishiga olib keladi. Shunday xavf mavjud. Balki uning shifokori futbolchiga: "Uch oydan keyin mashg‘ulotni boshlayver, qolganini ko‘ramiz", degandir", — dedi Kris Uilson "Daily Mail" nashriga bergan intervyusida.

Eslatib o‘tamiz, Keyn Angliya chempionatining 21-turi doirasida "Sautgempton"ga qarshi bo‘lib o‘tgan o‘yinda (0:1) jarohat olgan edi. Ushbu jarohat tufayli o‘yinchi jarrohlik stoliga yotishga majbur bo‘ldi.