"Тоттенхэм" клуби ва Англия терма жамоаси ҳужумчиси Харри Кейн жароҳатидан тикланиши учун аввал хабар берилганига нисбатан кўпроқ вақт кетиши мумкин. Бу ҳақда англиялик жарроҳ Крис Уилсон хабар тарқатди.

"Унинг олти ойдан кейин сафга қайтиши кутяпман. Агар мен у билан гаплашганимда, уни чалғитмаслик учун аниқ айтган бўлардимки, операциядан 6 ой ўтиб у ўйнашга тайёр бўлиши мумкин.

Кейн апрель ёки май ойида майдонга қайтиши мумкин, деган гапларни эшитдим. Агар бу вақтда у машғулотларга қайтса, бунга ҳайрон бўлардим. Муддатидан эрта қайтиш жароҳатнинг такрорланишига олиб келади. Шундай хавф мавжуд. Балки унинг шифокори футболчига: "Уч ойдан кейин машғулотни бошлайвер, қолганини кўрамиз", дегандир", — деди Крис Уилсон "Daily Mail" нашрига берган интервьюсида.

Эслатиб ўтамиз, Кейн Англия чемпионатининг 21-тури доирасида "Саутгемптон"га қарши бўлиб ўтган ўйинда (0:1) жароҳат олган эди. Ушбу жароҳат туфайли ўйинчи жарроҳлик столига ётишга мажбур бўлди.