«Барселона» ёзги трансфер ойнаси якунланишидан олдин ҳимоя чизиғини янада кучайтириш имкониятини кўриб чиқмоқда. SPORT маълумотига кўра, каталонияликлар асосан чап оёқда ҳаракат қиладиган марказий ҳимоячи харид қилишни истамоқда.
Клубнинг қисқа рўйхатидан Эмерик Лапорт, Кастелло Люкеба ва Натан жой олган.
32 ёшли Лапорт айни пайтда «Атлетик» шарафини ҳимоя қилмоқда. Испания миллий жамоаси аъзоси 2025 йил сентябрида «Ан-Наср»дан Бильбао клубига қайтиб, 2028 йил ёзигача мўлжалланган шартнома имзолаган.
Лапортнинг «Барселона»га ўтиши ҳақида ёз давомида бир неча бор хабарлар тарқалди. Шу билан бирга, «Атлетик» раҳбарияти июль ойида каталонияликлардан ҳимоячи бўйича ҳеч қандай расмий ёки норасмий таклиф олмаганини маълум қилган эди.
Яна бир номзод — «РБ Лейпциг»нинг 23 ёшли франциялик ҳимоячиси Кастелло Люкеба. У Германия клуби билан шартномасини 2029 йилгача узайтирган. Люкеба сўнгги мавсумларда Бундеслигадаги энг истиқболли марказий ҳимоячилардан бири сифатида эътибор қозонди. «Барселона» спорт директори Деку ва бош мураббий Ҳанси Флик ҳам футболчининг имкониятларини юқори баҳолаётгани хабар қилинмоқда.
Рўйхатдаги учинчи футболчи — «Бетис»нинг бразилиялик марказий ҳимоячиси Натан. 25 ёшли футболчининг Севилья клуби билан амалдаги шартномаси 2030 йилгача мўлжалланган. «Бетис» уни 2025 йил ёзида «Наполи»дан тўлиқ сотиб олган эди.
Натаннинг агенти Андре Кюри ҳам «Барселона» футболчига қизиқиш билдираётганини тасдиқлаган. Унинг айтишича, каталонияликлар «Бетис» раҳбарияти билан ҳимоячи борасида алоқа қилган, бироқ ҳозирча расмий таклиф тақдим этилмаган. Испания матбуоти «Бетис» муносиб таклиф тушса, футболчини сотиш масаласини кўриб чиқиши мумкинлигини ёзмоқда.
Шу тариқа, «Барселона» олдида турли молиявий ва спорт жиҳатларига эга уч вариант мавжуд. Лапорт катта тажрибаси билан ажралиб турса, Люкеба келажак учун юқори салоҳиятли вариант ҳисобланади. Натан эса Ла Лига муҳитига мослашиб бўлгани билан каталонияликлар учун қизиқарли номзод бўлиб турибди.
