Мадриднинг «Реал» клуби ҳужумчиси Килиан Мбаппе жароҳат сабаб Франция терма жамоаси ихтиёрини тарк этмоқда.

«Учранглилар» сардори Миллатлар лигаси доирасида Туркияга қарши кечган жума кунги ўйинда (1:0) 54-дақиқада гол урди, аммо 59-дақиқадаёқ тиззасидаги муаммолар сабаб майдонни тарк этди.

«Килиан Мбаппе ғалаба голи билан якунланган зарба бериш пайтида тиззасини жароҳатлаб олди. Футболчида пай жароҳати ташхисланган, шу сабабли у йиғинни тарк этишга мажбур. Тезроқ соғайиб кетишингни тилаймиз, Килиан», – дейилади Франция терма жамоаси матбуот хизмати хабарида.

Яқин орада 27 ёшли форвард Мадридга қайтади ва у ерда тикланишнинг аниқ муддатларини аниқлаш учун қайта тиббий кўрикдан ўтади.