Madridning «Real» klubi hujumchisi Kilian Mbappe jarohat sabab Fransiya terma jamoasi ixtiyorini tark etmoqda.

«Uchranglilar» sardori Millatlar ligasi doirasida Turkiyaga qarshi kechgan juma kungi o‘yinda (1:0) 54-daqiqada gol urdi, ammo 59-daqiqadayoq tizzasidagi muammolar sabab maydonni tark etdi.

«Kilian Mbappe g‘alaba goli bilan yakunlangan zarba berish paytida tizzasini jarohatlab oldi. Futbolchida pay jarohati tashxislangan, shu sababli u yig‘inni tark etishga majbur. Tezroq sog‘ayib ketishingni tilaymiz, Kilian», – deyiladi Fransiya terma jamoasi matbuot xizmati xabarida.

Yaqin orada 27 yoshli forvard Madridga qaytadi va u yerda tiklanishning aniq muddatlarini aniqlash uchun qayta tibbiy ko‘rikdan o‘tadi.