Osiyo o‘yinlarining futbol musobaqasida O‘zbekiston U-23 terma jamoasi Saudiya Arabistonini 3:0 hisobida mag‘lub etib, yarim finalga yo‘l oldi.
Ravshan Haydarov shogirdlari chorak final bahsini ishonchli boshladi va 12-daqiqadayoq hisobni ochishga muvaffaq bo‘ldi. Dilshodbek Murtazoyev raqib darvozasini ishg‘ol qilib, jamoamizni oldinga olib chiqdi — 1:0.
Birinchi bo‘lim qolgan qismida hisob o‘zgarmadi. O‘zbekiston minimal ustunlik bilan tanaffusga yo‘l oldi.
Ikkinchi bo‘limda ham terma jamoamiz o‘z ustunligini saqlab qoldi. Uchrashuvning 77-daqiqasida Azizbek To‘lqinbekov Saudiya Arabistoni darvozasiga ikkinchi golni urdi va jamoamizning yarim finalga chiqish imkoniyatini yanada oshirdi.
Bahs yakuniga yaqin esa hisob yirik ko‘rinish oldi. 87-daqiqada zaxiradan maydonga tushgan Firdavs Abdurahmonov raqib darvozasini ishg‘ol qilib, uchrashuvga nuqta qo‘ydi — 3:0.
Shu tariqa, O‘zbekiston U-23 Saudiya Arabistonini yirik hisobda mag‘lub etib, Osiyo o‘yinlarining ilk yarim finalchisiga aylandi.
Ravshan Haydarov jamoasi musobaqada hozircha mukammal natija qayd etmoqda. O‘zbekiston guruh bosqichida Filippinni 5:1, Quvaytni 2:0 va Vyetnamni 2:0 hisobida yenggan edi. Chorak finaldagi g‘alaba bilan jamoamizning ketma-ket g‘alabalari soni to‘rttaga yetdi.
Endi O‘zbekiston 30 sentyabr kuni final yo‘llanmasi uchun Yaponiya — KXDR juftligi g‘olibiga qarshi maydonga tushadi. Osiyo o‘yinlarining futbol bo‘yicha final bahsi esa 3 oktyabrga belgilangan.
Osiyo o‘yinlari. Futbol
O‘zbekiston — Saudiya Arabistoni — 3:0
Gollar: Murtazoyev, To‘lqinbekov, 77, Abdurahmonov, 87.
O‘zbekiston: Muratbayev, Hamidov, Murtazoyev, Rizaqulov, Xushvaqtov, Bahromov, Saidnurillayev, Urinboyev (sardor), Jumayev, To‘lqinbekov, Fayzullayev.
Almashtirishlar: 62 — Saidnurillayev — Karimov; 85 — Jumayev, Rizaqulov — Shodiboyev, Abdullayev.
Bosh murabbiy: Ravshan Haydarov.
