Ispaniya terma jamoasi rasmiy uchrashuvlardagi mag‘lubiyatsiz seriyasini 39 ta o‘yinga yetkazib, jahon rekordini yangiladi. Ispaniyaliklar UYEFA Millatlar ligasi A ligasi 3-guruhi 1-turida Angliyani 3:2 hisobida mag‘lub etdi. Uchrashuv London shahridagi «Uembli» stadionida bo‘lib o‘tdi.

Uchrashuvda gollarni Ispaniya safida Lamin Yamal (2-daqiqa), Aleks Baena (60) va Mikel Oyarsabal (74) kiritdi. Angliyaning gollariga esa Entoni Gordon (36) va Harri Keyn (40) mualliflik qildi.

Ispaniya so‘nggi marta rasmiy uchrashuvda asosiy vaqtda 2023 yil mart oyida mag‘lub bo‘lgan. Yevropa chempionati — 2024 saralashining A guruhidagi 2-turda Luis de la Fuente shogirdlari Shotlandiyaga 0:2 hisobida imkoniyatni boy bergan.

Shu tariqa ispaniyaliklar rasmiy o‘yinlarda mag‘lubiyatsiz o‘tkazilgan uchrashuvlar bo‘yicha o‘zlariga tegishli jahon rekordini yangiladi. Ular bundan avval rekordni o‘tgan yozda Jahon chempionati finalida 38 ta o‘yinga yetkazgan edi.

Avvalgi rekord Italiya terma jamoasiga tegishli bo‘lgan. Italiyaliklar 2018 yil sentyabridan 2021 yil oktyabriga qadar 37 ta rasmiy uchrashuvda mag‘lubiyatga uchramagan.

Luis de la Fuente Ispaniya terma jamoasi bosh murabbiyi sifatida 51 ta uchrashuv o‘tkazdi. Uning jamoasi bu bahslarning 41 tasida g‘alaba qozongan, 7 marta durang o‘ynagan va 3 bor mag‘lub bo‘lgan.

Ispaniyaning de la Fuente qo‘l ostidagi mag‘lubiyatlari 2023 yildagi Shotlandiyaga qarshi o‘yin (0:2), 2024 yildagi Kolumbiya bilan o‘rtoqlik uchrashuvi (0:1) hamda UYEFA Millatlar ligasi — 2025 finalida Portugaliyaga qarshi bahsda (2:2, penaltilar seriyasida 3:5) qayd etilgan.