«Real», «Anji» va Braziliya terma jamoasining sobiq himoyachisi Roberto Karlos yosh futbolchilarni uning xatolarini takrorlamaslikka chaqirdi.

«Men doimo futbolchilik faoliyatim tugaganidan keyingi hayot haqida o‘ylardim. Futbolchi sifatida o‘z nomingni yaratish va mashhurligingdan to‘g‘ri foydalanish juda muhim.

Faoliyatimni yakunlashga qaror qilgan paytimda sport direktori lisenziyasiga ega edim va ko‘plab brendlar bilan hamkorlik qilardim.

Ammo keyin jiddiy muammolarga duch keldim. Ayrim odamlar sabab bank hisobim deyarli bo‘shab qoldi. Agentlar va oilaviy muammolar tufayli futbolda ishlab topgan mablag‘imning 99 foizini yo‘qotdim.

Men ko‘p xatolar qildim. Shuning uchun yosh futbolchilardan mening xatolarimni takrorlamasliklarini so‘rayman.

Sobiq vakilim bilan juda jiddiy muammolarim bo‘lgan. Oilamda ham og‘ir vaziyat yuzaga keldi. Bir payt payshanba kuni tun yarimda uxlashga yotdim, juma kuni esa mavjudligini hatto bilmagan hujjatlar to‘plamini oldim. O‘sha paytda faoliyatim davomida erishgan deyarli barcha narsamdan ayrildim», — dedi Roberto Karlos.