"Челси" маҳаллий вақт билан соат 17:00 га қадар ярим ҳимоячи Энцо Фернандесни сотиб олиш бўйича бирорта ҳам ёзма таклиф олмади. Лондон клуби айнан шу вақтни футболчининг эҳтимолий трансферини муҳокама қилиш учун сўнгги муддат сифатида белгилаган эди. Бу ҳақда журналист Фабрицио Романо X ижтимоий тармоғида маълум қилди.
Манбага кўра, "Челси" энди 25 ёшли футболчини 120 млн фунт, яъни тахминан 140 млн евро эвазига сотиш вариантини кўриб чиқмаяпти. Айнан шу сумма май ойи охирида эҳтимолий харидорларга маълум қилинган эди.
Энцо Фернандес 2023 йил январидан бери "Челси" сафида тўп суриб келмоқда. Унинг Лондон клуби билан амалдаги шартномаси 2032 йил ёзига қадар мўлжалланган.
Transfermarkt портали маълумотига кўра, аргентиналик ярим ҳимоячининг бозор қиймати 100 млн еврони ташкил этади.
