Chempionlik tituli uchun ko‘zi libosining rangi kabi qip-qizil qonga to‘lgan “Liverpul” yaqin ta’qibchisini 22 ochkoga ortda qoldirayotgani bois APL sayyorasining tortish kuchi pasaygandek tuyulmoqda. Ya’ni, hali biz bahorga yetmasdanoq bosh sovrin sohibi nomini bilamiz, go‘yo! Bahslashish noo‘rin mavzu! Klopp jamoasi haqiqatda tengsiz! Ammo, bu dunyodagi eng tomoshabop liganing umumiy mavqeiga qanday ta’sir o‘tkazmoqda?! Teletranslyasiyalar hajmi salbiylashmayaptimi? Umuman, masalan neytral bir muxlisning APLni kuzatishga ishtiyoqi pasaydimi?

Bilmadim! Mening nazdimda, Angliya chempionati so‘nggi 10-15 mavsum ichida jamg‘argan zahirasi bilan o‘z auditoriyasini past templarda ham yana 10-15 mavsum ushlab tura oladigandek tuyuladi. Gap bu yerda yakka yetakchining ajrab qolishi-yu, intrigalarning kamayib ketishida emas. Gap APL atrofidagi marketing, PR-media va translyasiya ishlarining eng oliy darajada yo‘lga qo‘yilganidadir.

Qisqa muddatli sharhlovchilik va o‘rta muddatli muxlislik tajribamdan kelib chiqib shuni aytishim mumkin-ki, APL translyasiyalari kabi ko‘ruvchiga mazmunli informasiya bera oladigan boshqa liga yo‘q! Deyarli hammasi ko‘zda tutilgan. Bundan tashqari o‘yin oldi va o‘yindan so‘nggi mahsulotlar sifati bo‘yicha ham inglizlarning oldiga tushadigani yo‘q. APL World, Premier league preview magazine kabi dasturlar Futbol TV tomonidan ham muntazam taqdim etib kelinadi.

Qisqa qilib aytganda, APL nafaqat juda qimmatbaho va o‘ta xushta’m mahsulot, balki, ayni vaqtda o‘ta ko‘rkam va elegant usulda qadoqlangan mahsulotdir! Nima ham deyish mumkin?! Bu daromadni to‘g‘ri taqsimlash natijasidir. Qachonlardir “A” seriya “kichik mundial” deb nomlanar va millionlar diqqati markazida edi. Keyin chempionat inqirozga yuz tutgach qadoqning sifatsizligi birlamchi mahsulotning yaroqlilik muddatiga salbiy ta’sir o‘tkazdi. Tumanli albionda esa inqiroz davrlari uchun ham rejalar mavjud!

Orif Tolipov.