Yevropa ligasida nimchorak final bosqichining barcha ishtirokchilari aniq bo‘ldi. Kecha «Ayntraxt» klubi «Red Bull Zalsburg» bilan durang o‘ynab, ikki o‘yin natijasiga ko‘ra keyingi bosqich yo‘llanmasini qo‘lga kiritdi.

Shu tariqa, Germaniyaning 6ta klubi yevrokuboklarning 1/8 finaliga chiqdi. Yevropa ligasida «Bayer», «Volfsburg» va «Ayntraxt» o‘z ishtirokini davom ettirayotgan bo‘lsa, Yevropa chempionlar ligasining nimchorak finalida «Bavariya» (dastlabki o‘yinda «Chelsi» 3:0 hisobida mag‘lub eti), «RB Leypsig» («Tottenxem»ni mag‘lub etdi — 1:0) va «Borussiya» Dortmund («PSJ» ustidan g‘alaba qozondi — 2:1) klublari dastlabki o‘yinlarni o‘tkazishdi.

Angliyaning esa ikkita jamoasi — «Manchester Yunayted» va «Vulverxempton» Yevropa ligasida 1/8 finalga chiqishdi. «Chelsi», «Tottenxem», «Liverpul» va «Manchester Siti» klublari YECHLda chorak finalga chiqish uchun kurash olib borishmoqda.

Shuningdek, Ispaniyadan ham 6ta jamoa yevrokuboklarning nimchorak final bosqichida o‘z yurishini davom ettirishmoqda. «Real», «Atletiko», «Barselona» va «Valensiya» YECHL, «Xetafe» va «Sevilya» esa Yevropa ligasining ushbu bosqichigacha yetib kelishdi.  

Italiya esa 5ta klub bilan o‘z ishtirokini davom ettirmoqda. «Yuventus», «Napoli» va «Atalanta» YECHLda, «Roma» va «Inter» Yevropa ligasining pley-off bosqichidan chiqib ketishmadi. Fransiyada esa 2ta klub qoldi — «PSJ» va «Lion» (har ikkasi Chempionlar ligasida).

Portugaliyaning barcha klublari yevrokuboklardan chiqib ketgan bo‘lsa, Daniya, Gresiya, Turkiya, Ukraina, Avstriya, Shveysariya va Shotlandiyaning bittadan jamoalari Yevropa ligasida ishtirok etishmoqda.