Ayni paytda koronavirus pandemiyasi tufayli to‘xtab qolgan Italiya chempionatini davom ettirish borasida klublar bir to‘xtamga kela olishmayapti.

A seriya klublari o‘rtasidagi navbatdagi yig‘ilish esa «Yuventus» va «Lasio» prezidentlari — Andrea Anyelli va Klaudio Lotito o‘rtasidagi tortishuv bilan yakunlandi. Bu haqda "Tuttosport" xabar tarqatdi.

Rimliklar rahbari epidemiya to‘xtashiga va chempionat davom ettirilishiga ishonmoqda. "Ma’lumotlarni ko‘rdingizmi? Virus chekinadi! Men mutaxassislar bilan gaplashdim", - dedi Lotito yig‘ilish davomida. Anyelli esa vaziyatga biroz o‘zgacha yondoshgancha: "Albatta, siz endi tajribali virusologga aylandingiz", - deya javob berdi.

Ma’lumot o‘rnida. Chempionat to‘xtalishidan oldin "Yuventus" va "Lasio" klublari A seriyaning yuqori pog‘onalarini egallab turishgan edi. Ularni faqat 1 ochko ajratib turibdi. Shu bois rimliklar chempionat davom ettirilishiga va uzoq kutilgan chempionlikni qo‘lga kiritilishiga umid qilishmoqda.