Belarus chempionatida o‘z o‘yinlari bilan shov-shuv ko‘tarayotgan hamyurtimiz “Energetik-BGU” klubirasmiy sayti uchun intervyu berib o‘tdi. Jasur Arveladze, Xavi, Shomurodov va hatto palov haqidagi fikrlari bilan o‘rtoqlashdi.

— Nima uchun ko‘pchilik senda rus tili bilan muammo bor deb hisoblaydi?

— Aslida hech qanday muammo yo‘q. Men suhbatdoshimning har bir so‘zlarini anglab turaman, faqat javob qaytarayotganimda atrofim to‘la odamlar bo‘lgani bois hayajonlanib ketaman. Biroz uyalganim uchun ham javob berishga qiynalaman.

— Bo‘sh vaqtingni qanday o‘tkazyapsan?

— To‘g‘risi, deyarli ko‘chaga chiqmayman. Ba’zan jamoadoshlarimdan “playstation”ni ijaraga olishim mumkin. Asosan film va retro futbol uchrashuvlarini tomosha qilyapman. Ayniqsa, “Arsenal” va “Barselona” klublarning o‘yinlarini zavq bilan tomosha qilaman.

— Bilishimiz bo‘yicha sen klassik hujumchi emassan?

— Ha, Minskka kelgunimga qadar o‘ng qanot yarim himoyachisi edim. Murabbiyimiz – Anatoliy Ivanovich meni oldingi chiziqda to‘p tepishimni istadi. Avvallari Hatem Ben Arfaning o‘yinlarini tomosha qilib mazza qilar edim. Endilikda, markazga ko‘chganim bois Messini kuzatishni boshladim. U hujumchi emas, shunchaki maydondagi ijodkor. To‘p uchun maydon markaziga qadar kelishi, hujum paytida jarima maydonchasining ichida paydo bo‘lishi mumki. Ayni damda klubim ham mendan aynan shunday harakat qilishimni talab qilmoqda.

— Bizning qish juda sovuq. Vaholanki, bu yil qish suvoq kelmadi. Ob-havo borasida qanday fikrdasan?

— Ochig‘i ob-havo juda sovuq ekan. Mashg‘ulotlarda sharf, qo‘lqop va boshkiyimlardan foydalanishimga to‘g‘ri keldi. Hatto hozir ham ko‘chaga yengil kiyinib chiqishning iloji yo‘q. O‘zbekistonda esa barcha yozgi kiyimlarga o‘tib ketib bo‘ldi.

— O‘zbekistonda issiqdan saqlanish uchun qaynoq choy ichiladimi? — Ha. Bizda kofe deyarli ichilmaydi. Choy bizning milliy ichimligimiz desam, adashmagan bo‘laman. Bu yerda choyni barcha sovutib chanqoq bosti ichimlik sifatida ichar ekan. Aslida, turli gazli ichimliklardan ko‘ra choy foydaliroq.

— Sen tug‘ilib o‘sgan Chinoz qanday shahar?

— Barcha u yerni “baliq koni” deb ataydi. Uyimizdan 5 km uzoqlikda O‘rta Osiyodagi eng uzun daryo sanalmish Sirdaryo oqib o‘tadi. Shahrimizda mamlakatimizdagi eng mashhur baliq bozori joy olgan. Bozor kechqurun soat 8 da ochiladi va tonggi 4 ga qadar davom etadi. Havo issiq bo‘lgani bois, baliqlar hidlanib qolmasligi uchun. Baliqlarning turlari juda ko‘p. Hatto mendan katta somlarni ham uchratasiz. Bozor ro‘pasida tamaddixonalar kunu-tun ishlab turadi. U yerda siz istagan baliqdan istagan taomingizni tayyorlab berishadi. Ishoning, o‘sha taomlarning mazasi og‘zingizda qoladi.

— Demak yoshligingda deyarli har kuni baliq iste’mol qilgan ekansanda?

— Bizga Chirchiq daryosi yanada yaqinroq bo‘lgani bois, do‘stlarim bilan daryo bo‘yiga borar edik. Baliq ovi juda maroqli jarayon. Kechga borib barcha o‘ljalarni qirg‘oq bo‘yida o‘choq osib paqqos tushirgancha ortga qaytar edik.

— Palov tayyorlashni ham bilsanmi?

— Afsuski yo‘q. Shunga qaramay yaqinda Mavatuva Atemenglarni Minskdagi o‘zbek choyxonalaridan biriga olib bordim. Ular ilk bor palovni tatib ko‘rishdi. Ularga juda yoqdi. To‘g‘risi, bizning yurtimizda bu taom umuman o‘zgacha. Maxsus guruchdan tayyorlaganingiz uchun ta’mi ham umuman o‘zgacha bo‘ladi. Ayniqsa, qo‘y go‘shtidan toy-marakalarda tayyorlangan palov bilan Minskdagisi o‘rtasida farq juda katta.

— Senga o‘zbek oshxonasi juda yoqar ekanda?

— Albatta! Manti, somsa, sho‘rva, lag‘mon. Mana shular menga Minskda yetishmayapti (kuladi).

— Taomlaringiz juda ham yog‘li ekanligi rostmi? Bu sportchiga muammolar tug‘dirmaydimi?

— To‘g‘ri, taomlar biroz yog‘li, biroq biz o‘rganib qolganimiz bois yomon ta’sir o‘tkazmaydi.

— Hozir Ramazon oyi ketmoqda. Sen faqat quyosh botgach taomlanyapsanmi?

— Nafaqat taom, balki suv ham ichish mumkin emas. Qiyin, biroq biz buni uddalayapmiz. Birinchi hafta mushkul bo‘ladi, biroq keyin ko‘nikib qolasiz. Kun botishi bilan birdan taomlanish mumkin emas. Oshqozonga og‘irlik qilishi mumkin. Avvaliga oz-ozdan suv va shirinliklar. Bir soatlardan so‘ng, odatdagidek taomlanish mumkin.

— Bunday holatda, futbol uchrashuvlari va mashg‘ulotlar uchun kuchni qayerdan olyapsan?

— Buning uchun ko‘p uxlash talab etiladi. Agar kam uxlasangiz, organizm ovqat talab qilishni boshlaydi. Yaxshi uyqu ochlikni osonlik bilan yengib o‘tadi.

— Uydan uzoqda senga nima yetishmayapti?

— Jigarlarimni sog‘inaman. Biz uyda 5 farzandmiz. Men eng kattasiman. Bitta ukam va 3 ta singlim bor.

— Minsk shahridagi nimaga moslashish qiyin bo‘lmoqda?

— Ovqatlargaku ko‘niksa bo‘ladi, ammo sizlarning mentalitetingizga emas. Bu yer musulmonlar istiqomat qiladigan mamlakat emas. Xalqingizning mentaliteti ham biznikidan keskin farq qiladi. Shu sababli, ko‘chalarda sigaret chekish, ayniqsa ichkilik ichayotgan insonlarga ko‘nikish biroz mushkul bo‘lmoqda. Afsuski, bu holat har kuni amalga oshadi. To‘g‘ri, barcha shu ishni qilyapti, menga mumkin ekan degan fikr yo‘q. Ichkilik biz uchun harom qilingan. Buni yaxshi bilaman, hech qachon ichmayman. Shunga qaramay,har kuni mana shunday sahnalarni ko‘chada ko‘rish insonni biroz zaiflashtiradi.

— Belarusva o‘zbek nimasi bilan bir-biridan farq qiladi?

— O‘z-o‘zidan keskin farq qiladi. Barcha sobiq Ittifoq davlatlari bir-biriga o‘xshamagani kabi. O‘zbeklar janubliklar bo‘lgani bois, biroz qiziqqonroq. Shunday bo‘lsada, men og‘ir-bosiq o‘zbekman. Uncha-bunchaga qizishmayman.

— Aytishlaricha, yurtingiz iqtisodikeskin yaxshilanmoqda?

— Ha, prezidentimiz barcha sharoitlarni yaratib bermoqdalar. Yildan-yilga aholi turmush tarzi yaxshilanmoqda.

— Nimaning evaziga o‘zbekistonda kuchli futbolchilar yetishib chiqmoqda?

— Bizning futbolchilar tehnika borasida hech kimda qolishmaydi. Afsuski, jismoniy tomondan bizning imkoniyatlarimiz biroz pastroq. Kuchli pressing, kurashlarga boy uchrashuvlarda biroz futbolchilarimiz oqsaydi. Shu sababli, Yevropa klublaridan o‘zbeklar yo‘q hisob.

— O‘zbek futbol yulduzlarining qaysilari bilan yaqindan tanishsan?

— Odil Ahmedov va Eldor Shomurov bilan. Eldor bugungi kunda O‘zbekistondagi eng kuchli futbolchi. U o‘zining eng pik formasiga kirib olgan. Yulduzli daqiqalarini o‘tkazmoqda desam, adashmagan bo‘laman. Ularning ikkisi bilan ham termajamoa sharafini himoya qilganman. Hatto Eron va Urugvay singari jamoalarga qarshi uchrashuvlarda maydonga ham tushganman.

— O‘zbek futbolidagi “avtoritet” kim?

— So‘zsiz Mirjalol Qosimov. Aynan ularning qo‘l ostida AGMKda to‘p surish nasib etgan menga. Shuningdek,Jafar Irismetov va Ravshan Ermatovni ham qayd etgan bo‘lar edim.

— OCHLda qanday dunyo yulduzlari bilan to‘qnash kelgansan?

— Xavi, Gabi, Negredo, va Snayder. Ularning maydonni ko‘rish qobiliyatiga qoyil qolmaslikning iloji yo‘q. Xavi oldidagi 3 ta raqibi ko‘rdim demaydi. Ularning o‘yiniga qarab turib, qanday qilib, degan savolni o‘zimga beraman.

— “Energetik” seni ijaraga olgan. Toshkentdan seni ortga chorlashmayaptimi?

— Hozircha yo‘q. Ochig‘i,o‘zim ham qaytmoqchi emasman. Yevropada o‘ynashni istayman. Boz ustiga,SHota Arveladze bilan ham aloqalarim yaxshi emas. Qaysidir uchrashuvda meni almashtirganida, xafa bo‘lganim bois uning qo‘lini havoda qoldirgan edim. O‘sha voqeadan so‘ng, zaxirada qolishni boshladim. U meni atigi 10 daqiqa maydonga tushirar edi. Undan ortig‘iga emas. Bunday vaqt ichida nimaga ulgurish mumkin? Shu sababli to‘pni his qilish va o‘yin tempini his etishni unutib qo‘ydim va formamni yo‘qotdim. To‘pni qabul qilishim bilan nima qilishni bilmay qoldim. O‘yinim tobora yomonlashayotgnini his qila boshladim. Agar 10 daqiqani ideal tarzda o‘tkazsang ham kelasi uchrashuvni baribir zaxira o‘rindig‘ida boshlaysan. Buni bilib to‘p tepishjuda mushkul. Bu ruhan insonni sindirib qo‘yadi. Bugungi kunda “Energetik”da murabbiylar menga to‘liq ishonch bildirmoqda. Ularning ishonchini oqlash uchun tinimsiz harakat qilyapman.

— Chempionatda nechta gol kiritishni rejalashtiryapsan?

— Har bir uchrashuvda gol urishni yoki assistni amalga oshirishni istayman.

— Mavsum oldi yig‘inlar jismonan toliqtirib qo‘ymadimi?

— To‘g‘risi, rosa holdan toydirishdi. Bizda mashg‘ulotlar yuklamasi bunga yaqin ham kelmaydi. Ba’zi mashqlarda murabbiylar meni ayab dam olishga ruxsat berishdi.

— Qachon Minskdan Toshkentga qaytmoqchisan?

— Yozda ortga qaytishni rejalashtirgan edim. Chinozda to‘y qilmoqchimiz. Afsuski, hozir chegaralar yopilgan. Endi to‘yni kuzga qoldirishga to‘g‘ri keladigan ko‘rinadi.