«Barselona» sardori Lionel Messining amakivachchasi Maksi Byankukki futbolchining Argentina chempionatiga qaytish ehtimoli haqida fikr bildirdi.

«Leo Argentinani juda yaxshi ko‘radi, ammo odamlar buni tushunishmaydi. Agar bu yer xavfsiz bo‘lganida, u Argentinada o‘ynagan bo‘lardi, bunga shubha yo‘q. Faoliyatini yakunlash chog‘ida unga ta’sir qilishi mumkin bo‘lgan yagona narsa shu. Leoni «Nyuells»da ko‘rish – mening orzum, lekin bu amalga oshishi qiyin bo‘lgan ish. Tasavvur qiling, Messi «klasiko»da o‘ynaydi, bolalar esa maktabga borishlari kerak... Bu shahar — haqiqiy jahannam», — dedi Byankukki.

Ma’lumot o‘rnida. Messi bolalagida «Nyuells Old Boyz» futbol maktabiga qatnagan. Shundan so‘ng o‘smirlik chog‘ida «Barselona» uni o‘z akademiyasiga olib ketgan.