Joriy mavsum davomida «Manchester Yuneyted» va «Chelsi» klublari o‘zaro 3 marta to‘qnash kelishgan va ularning barchasida Sulsher jamoasi g‘alaba qozongan edi. Bu safar esa ular Angliya kubogi yarim final bosqichida uchrashishdi. G‘alaba esa Lempard jamoasi tomonida bo‘ldi.

Bugun mankunianliklar darvozaboni David de Xea ishonchli harakat qila olmadi. O‘tkazib yuborilgan 3ta golda uning aybi bor, desak ham bo‘ladi. Birinchi bo‘limga qo‘shib berilgan 11-daqiqada o‘ng qanotdan yetkazilgan uzatmani Jiru darvoza tomon burdi. To‘p posbonning qo‘liga tegib, chiziqni kesib o‘tdi.

Ikkinchi bo‘limning ilk daqiqasida esa himoyachilarning uzatma berishdagi xatosidan so‘ng Maunt jarima maydoni tashqarisidan zarba berdi. David de Xea yaqin burchagidan to‘pni o‘tkazib yubordi. To‘p yana uning qo‘liga tegib, to‘rga borib tushdi.

Bahsning 74-daqiqasida esa chap qanotdan yetkazilgan uzatmadan so‘ng to‘p Maguayrning oyog‘iga tegib, darvozabonning yaqin burchagidan to‘rga borib tushdi.

"MYU" bahs tugashiga 5 daqiqa qolganida penalti ishladi va Brunu Fernandesh undan samarali foydalandi.

Shu tariqa, "Chelsi" Angliya kubogi final yo‘llanmasini qo‘lga kiritdi. Lempard jamoasi sovrin uchun "Arsenal"ga qarshi maydonga chiqadi.

Angliya kubogi, yarim final
Manchester Yunayted – Chelsi 1:3 (0:1, 1:2)
Gollar: 0:1 – 45 Jiru, 0:2 – 46 Maunt, 0:3 – 74, avtogol Maguayr, 1:3 – 85, penalti Brunu Fernandesh.
Manchester Yunayted – De Xea, Uilyams, Maguayr, Bayi (Marsyal, 45), Uan-Bissaka (Fosu-Mensa, 79), Brunu Fernandesh, Fred (Pogba, 55), Djeyms (Grinvud, 56), Matich, Lindelef, Reshford (Igalo, 79).
Chelsi – Kabalyero, Djeyms, Ryudiger, Aspilikueta, Alonso, Maunt (Pedro, 90), Kovachich (Loftus-CHik, 86), Villian (Xadson-Odoi, 80), Jorjinyo, Zuma, Jiru (Abraxam, 80).
Ogohlantirish: Pogba (71).