Жорий мавсум давомида «Манчестер Юнейтед» ва «Челси» клублари ўзаро 3 марта тўқнаш келишган ва уларнинг барчасида Сульшер жамоаси ғалаба қозонган эди. Бу сафар эса улар Англия кубоги ярим финал босқичида учрашишди. Ғалаба эса Лэмпард жамоаси томонида бўлди.

Бугун манкунианликлар дарвозабони Давид де Хеа ишончли ҳаракат қила олмади. Ўтказиб юборилган 3та голда унинг айби бор, десак ҳам бўлади. Биринчи бўлимга қўшиб берилган 11-дақиқада ўнг қанотдан етказилган узатмани Жиру дарвоза томон бурди. Тўп посбоннинг қўлига тегиб, чизиқни кесиб ўтди.

Иккинчи бўлимнинг илк дақиқасида эса ҳимоячиларнинг узатма беришдаги хатосидан сўнг Маунт жарима майдони ташқарисидан зарба берди. Давид де Хеа яқин бурчагидан тўпни ўтказиб юборди. Тўп яна унинг қўлига тегиб, тўрга бориб тушди.

Баҳснинг 74-дақиқасида эса чап қанотдан етказилган узатмадан сўнг тўп Магуайрнинг оёғига тегиб, дарвозабоннинг яқин бурчагидан тўрга бориб тушди.

"МЮ" баҳс тугашига 5 дақиқа қолганида пенальти ишлади ва Бруну Фернандеш ундан самарали фойдаланди.

Шу тариқа, "Челси" Англия кубоги финал йўлланмасини қўлга киритди. Лэмпард жамоаси соврин учун "Арсенал"га қарши майдонга чиқади.

Англия кубоги, ярим финал
Манчестер Юнайтед – Челси 1:3 (0:1, 1:2)
Голлар: 0:1 – 45 Жиру, 0:2 – 46 Маунт, 0:3 – 74, автогол Магуайр, 1:3 – 85, пенальти Бруну Фернандеш.
Манчестер Юнайтед – Де Хеа, Уильямс, Магуайр, Байи (Марсьяль, 45), Уан-Биссака (Фосу-Менса, 79), Бруну Фернандеш, Фред (Погба, 55), Джеймс (Гринвуд, 56), Матич, Линделеф, Рэшфорд (Игало, 79).
Челси – Кабальеро, Джеймс, Рюдигер, Аспиликуэта, Алонсо, Маунт (Педро, 90), Ковачич (Лофтус-Чик, 86), Виллиан (Хадсон-Одои, 80), Жоржиньо, Зума, Жиру (Абрахам, 80).
Огоҳлантириш: Погба (71).